पोखरा विश्वविद्यालयको १६ औं दीक्षान्त समारोह २०७५ साल चैत्र २० गते बुधबार सम्पन्न भएको छ । पोखरा महानगरपालिका–३०, लेखनाथमा अवस्थित विश्वविद्यालयको हाताभित्र आयोजित उक्त दीक्षान्त समारोहबाट एम.फिल.तह, स्नातकतह तथा स्नातकोत्तर तहका गरी कुल ५ हजार ५ सय २८ जना विद्यार्थीहरू दीक्षित भएका थिए । दीक्षित विद्यार्थीहरूमध्ये व्यवस्थापन सङ्कायतर्फ स्नातकतहमा २,७९५ जना, स्नातकोत्तरतहमा ६९८ जना; स्वास्थ्य विज्ञान सङ्कायतर्फ स्नातकतहमा ५१३ जना, स्नातकोत्तरतहमा ३१ जना; विज्ञान तथा प्रविधि सङ्कायतर्फ स्नातकतहमा १,१३८ जना, स्नातकोत्तरतहमा २४८ जना तथा मानविकी तथा सामाजिकशास्त्र सङ्कायतर्फ स्नातकतहमा २० जना, स्नातकोत्तरतहमा ४९ जना र एम.फिल.तहमा ४२ जना छन् ।

दीक्षान्त समारोहमा विश्वविद्यालयको स्नातकतहका कार्यक्रमहरूमा सिजिपिए ३.७ वा सो भन्दा बढी अङ्क प्राप्त गर्ने तथा स्नातकोत्तर तहका कार्यक्रमहरूमा सिजिपिए ३.८ वा सो भन्दा बढी अङ्क प्राप्त गर्ने व्यवस्थापन सङ्कायतर्फ स्नातकतहमा १७९ जना, स्नातकोत्तरतहमा ७१ जना; स्वास्थ्य विज्ञान सङ्कायतर्फ स्नातकतहमा ४६ जना, स्नातकोत्तरतहमा १४ जना; विज्ञान तथा प्रविधि सङ्कायतर्फ स्नातकतहमा ६५ जना, स्नातकोत्तरतहमा २४ जना तथा मानविकी तथा सामाजिकशास्त्र सङ्कायतर्फ स्नातकतहमा १ जना, स्नातकोत्तरतहमा २ जना र एम.फिल.तहमा १ जना गरी कुल ४०३ विद्यार्थीहरूलाई डीन लिष्ट उपाधि प्रदान गरिएको थियो ।

दीक्षान्त समारोहमा स्नातकोत्तरतहका सम्पूर्ण कार्यक्रमहरूमा सबैभन्दा उच्चतम सिजिपिए ४ः०० अङ्क प्राप्त गर्ने विज्ञान तथा प्रविधि सङ्काय, निर्माण व्यवस्थापन विषयका छात्र सुशिल तिमल्सेना तथा व्यवस्थापन सङ्काय, व्यवसाय प्रशासन (वित्त) का छात्रा दिव्याज्योती पण्डितलाई स्वर्णाङ्कित कुलपति पदकबाट सम्मानित गरिएको थियो । त्यसै गरी स्नातक तहका सम्पुर्ण कार्यक्रमहरूमा सबै भन्दा उच्चतम सिजिपिए ३ः९७ अङ्क प्राप्त गर्ने व्यवस्थापन सङ्काय, व्यवसाय प्रशासनका छात्रा प्रनिसा घिसिङलाई स्वर्णाङ्कित उपकुलपति पदकबाट सम्मान गरिएको थियो । साथै व्यवस्थापन सङ्कायतर्फ व्यवसाय प्रशासन स्नातकोत्तरतहमा सबैभन्दा उच्च सिजिपिए ४ः०० अङ्क प्राप्त गर्ने व्यवसाय प्रशासन (वित्त) छात्रा दिव्याज्योती पण्डितलाई लक्ष्मी विद्या पदक–२०७५ तथा कम्प्युटर एप्लीकेशन स्नातकतहमा सबैभन्दा उच्च सिजिपिए ३.९२ अङ्क प्राप्त गर्ने विज्ञान तथा प्रविधि सङ्काय कम्प्यूटर एप्लीकेशनका छात्र नबिनकुमार कलवारलाई स्वर्णाङ्कित अक्सफोर्ड पदक–२०७५बाट सम्मानित गरिएको थियो ।

दीक्षान्त समारोहका प्रमुख अतिथि नेपाल प्रज्ञा प्रतिष्ठनाका उपकुलपति वरिष्ठ संस्कृतिविद् डा. जगमान गुरूङले दीक्षित विद्यार्थीहरूलाई सम्बोधन गर्दै हालको शिक्षा पद्धति बजारमुखी भएको र त्यसलाई यान्त्रिकीकरण गरी धन आर्जनको साधन बनाइएकोमा दुःख व्यक्त गर्नुभयो । उहाँले अहिलेको शिक्षामा नैतिक शिक्षाको अभाव भएकोले त्यो अति नै प्रत्युत्पादक भएको र यसबाट आदर्श र मर्यादापूर्ण विद्या अध्ययनको सट्टा बन्द, हडताल र आन्दोलनले प्रश्रय पाउने गरेको विचार व्यक्त गर्नुभएको थियो ।

दीक्षान्त समारोह विशेष कारणबश प्रधानमन्त्री तथा पोखरा विश्वविद्यालयका कुलपति के.पि. शर्मा ओली आउन नसकेपछि नेपाल सरकारका शिक्षा, विज्ञान तथा प्रविधि मन्त्री एवम् पोखरा विश्वविद्यालयका सह–कुलपति तथा गिरिराजमणि पोखरेलको अध्यक्षतामा बसेको थियो । १६ औं दीक्षान्तमा आफ्नो मन्तव्य दिंदै शिक्षामन्त्रीले शैक्षिक संस्था सैद्धान्तिक तथा व्यावहारिक ज्ञान तथा सीप सिक्ने, सिकाउने थलो भएकोले यो मानवजातिलाई सभ्य, दक्ष र ज्ञानी बनाउनेतिर अग्रसर हुनुपर्नेमा जोड दिनुभयो । शिक्षामन्त्री पोखरेलले रोजगारीका लागि देशको दक्ष र सीपयुक्त जनशक्ति विदेशिनु राष्ट्रको समृद्धि र विकासका लागि घाटा भएको उल्लेख गर्दै वर्तमान शिक्षा विदेश जाने लाइसेन्स बन्न नहुने विचार व्यक्त गर्नुभयो । उहाँले विश्वविद्यालयले गुणस्तरीय शिक्षाका लागि विशेष ध्यान दिनुपर्ने आवश्यकता औल्याउँदै यसका लागि जथाभावी सम्बन्धन दिन नहुनेमा जोड दिनुभयो । नेपाल सरकारले समयको मागलाई आत्मसात गर्दै नयाँ शिक्षा नीति ल्याउने तयारीमा रहेकाले उच्च शिक्षामा देखिने गरेका विसंगति र विकृति अन्त्य हुने उहाँको कथन थियो ।

दीक्षान्त समारोहमा स्वागत मन्तव्य राख्दै पोखरा विश्वविद्यालयका उपकुलपति प्राध्यापक चिरञ्जीवी प्रसाद शर्माले विद्यार्थीहरू प्रति मुलुकको ठूलो भरोसा, आसा र विश्वास रहेकाले विद्यार्थीहरूको एकमात्र दायित्व बास्तविक कर्मक्षेत्रमा गई आफूले आर्जन गरेको ज्ञान र सीपको सही प्रयोग गर्दै मुलुकको सर्वाङ्गीण विकास र आफ्नो उज्वल भविष्य निर्माण गर्ने काममा सरिक हुने हो भन्नुभयो । उहाँले विद्यार्थीले नैतिकवान भई व्यवहारिक धरातलमा उभिएर भावी दिनमा विश्वविद्यालयको अझ बढी श्रीबृद्धि हुने गरी कर्तव्यपथमा नभौतारिकन, सहि गलत के हो छुट्टाउँदै देशको एक गहना र अमूल्य सम्पत्तिको अनुभूत गरी शपथ लिनुपर्नेमा जोड दिनुभयो । उपकुलपतिले विश्वविद्यालयभित्र मौलाउँदै गएको अवान्छित गतिविधिहरूलाई निस्तेज पार्दै गुणस्तरीय शिक्षा र सेवा दिने विश्वविद्यालयको एक मात्र लक्ष्य तथा पवित्रत्म स्वच्छ कार्यका लागि नेपाल सरकारको नीति अनुरूप सुखी नेपाली समृद्ध नेपालको लक्ष्य पुरा गर्न विद्यार्थीहरू आ–आफ्नो कर्मक्षेत्रबाट अगाडि बढ्ने विश्वास लिएको उल्लेख गर्नुभयो ।

१६ औं दीक्षान्त समारोहमा विद्यार्थी, अभिभावकसहित १० औं हजार भन्दा बढीको उपस्थिति रहेको थियो । दीक्षान्त हुनुभन्दा ३, ४ दिन पहिले देखिनै पोखरादेखि बाहिरबाट आउने अभिभावक, परिवारसहितका विद्यार्थीहरूले पोखरा र लेखनाथमा चहलपहल ह्वात्तै बढेको थियो भने लेकसाइड, बेगनासताल लगायतका स्थानमा अवस्थित होटलहरू, रेष्टुराँहरू खचाखच भएका थिए ।