पोखरा विश्वविद्यालयको १८ औं साधारण सभाको बैठक प्रधानमन्त्री तथा पोखरा विश्वविद्यालयका कुलपति शेरबहादुर देउवाको अध्यक्षतामा मिति २०७४ श्रावण ३२ गते बुधबार प्रधानमन्त्री तथा मन्त्रिपरिषद्को कार्यालय, सिंहदरबार, काठमाडौंमा सम्पन्न भएको छ । उक्त सभाको बैठकलाई सम्बोधन गर्दै उपप्रधान तथा शिक्षामन्त्री एवम् पोखरा विश्वविद्यालयका सहकुलपति गोपालमान श्रेष्ठले विश्वविद्यालयलाई बेरोजगार उत्पादन गर्ने यन्त्र बनाउन नहुने विचार व्यक्त गर्नुभएको छ । पर्यटन, कृषि, जलविद्युत आदि क्षेत्रमा शैक्षिक कार्यक्रम सञ्चालन गर्न निर्देश दिंदै सहकुलपति श्रेष्ठले युवाको विदेश पलायन रोक्न र रोजगारीका अवसर सिर्जना गर्न विश्वविद्यालयलाई नाफा आर्जन गर्ने नभई विशुद्ध शिक्षा प्रदान गर्ने शैक्षिक संस्थाको रूपमा विकास र विस्तार गर्नुपर्नेमा जोड दिनु भयो ।

उहाले समयको मागलाई आत्मसात गर्दै देशको आवश्यकता अनुसार नया“ कार्यक्रमहरू थप्ने र देशको भौगोलिक अवस्थिति अनुसार महाविद्यालय तथा कार्यक्रमहरूको विस्तार गर्नुपर्ने औल्याउनु भयो । विश्वविद्यालयका सहकुलपति श्रेष्ठले कास्कीसग जोडिएका छिमेकी जिल्लाहरू स्याङ्जा लगायत पर्वत, लमजुङ्, गोरखा, तनहु, मनाङ्, मुस्ताङ् जिल्लामा एक एक वटा आङ्गिक कार्यक्रम सञ्चालन गर्न सुझाउदै त्यसका लागि सहयोग गर्न आफू हरतरहले प्रतिबद्ध रहेको विचार समेत व्यक्त गर्नुभयो ।

उक्त सभाको बैठकले आर्थिक वर्ष २०७३/०७४ को वास्तविक आय–व्यय र आ.व. २०७४÷०७५ को नीति तथा कार्यक्रम र बजेट पारित गरेको छ ।
सभाले पोखरा विश्वविद्यालयका रजिष्टार एवम् सभाका सदस्य–सचिव गोविन्दप्रसाद शर्माले पेश गर्नुभएको आर्थिक वर्ष २०७४/०७५ को लागि कुल ७२ करोड ७५ लाख ७६ हजारको बजेट स्वीकृत गरेको छ । स्वीकृति बजेटमध्ये पु“जीगत खर्चतर्फ रू. १९ करोड ९१ लाख ८६ हजार र साधारण खर्चतर्फ रू. ५२ करोड ८३ लाख ९० हजार रहेको छ ।

सभाले आर्थिक, सम्बन्धनसम्बन्धी, स्कूल तथा परीक्षा सञ्चालनसम्बन्धी, छात्रवृत्तिसम्बन्धी, स्ववियू आचारसंहितासम्बन्धी कार्य, नियमावलीहरूलाई हप्ता दशदिनभित्र समयसापेक्ष संशोधन तथा अन्तिम टुङ्गोमा पुग्ने गरी कुलपति समक्ष प्रतिवेदन बुझाउन विश्वविद्यालयका उपकुलपतिको संयोजकत्वमा ७ सदस्यीय अधिकारसम्पन्न समिति गठन समेत गरेको छ । यसका साथै सभामा पेश भएको पोखरा विश्वविद्यालय खरिद नियमावली २०७२ को संशोधन प्रस्ताव स्वीकृत भएको छ ।

पोखरा विश्वविद्यालय श्रावण १, २०७४ देखि २० वर्ष पुरा भई २१ औं वर्षमा प्रवेश गरेको छ । स्थापनाको २१ औं वर्षमा प्रवेश गरेको उपलक्ष्यमा विश्वविद्यालयले २०७४ श्रावण १ गते विश्वविद्यालयको प्राङ्गण लेखनाथमा एक विशेष कार्यक्रमको आयोजना ग¥यो । वार्षिकोत्सवमा विश्वविद्यालयको विगतदेखि वर्तमानसम्मको समिक्षात्मक चर्चा गरियो भने एनआईसि एशिया बैंकले विश्वविद्यालय हाताभित्र विभिन्न जातका ६०० वटा बिरूवा वृक्षारोपण गरेको थियो ।

वार्षिक उत्सवको कार्यक्रमलाई सम्बोधन गर्दै कार्यक्रमका सभापति एवम् पोखरा विश्वविद्यालयका रजिष्टार गोविन्दप्रसाद शर्माले देश अहिले सहमति र सहकार्यको राजनीतिमा चलेको जानकारी गराउँदै विश्वविद्यालय पनि त्यसबाट अछुतो रहन नसक्ने विचार व्यक्त गर्नुभयो । उहाँले साना तिना मसिना मतभेद, स्थार्थका कुरा छाडेर वृहत हितका लागि सोच्न सकिएमा पोखरा विश्वविद्यालयले शिक्षा, स्वास्थ्य, पर्यटन र उद्योगको विकास र विस्तारमा यस क्षेत्रलाई नै समृद्ध र वैभवशाली बनाउन सक्ने धारणा राख्नुभयो । एक प्रश्नको उत्तर दिंदै रजिष्टार शर्माले पोखरा विश्वविद्यालयका कार्यक्रम देशव्यापी फैलिएर सञ्चालन भइरहेकाले यो एक प्रदेशमा मात्र खुम्चेर सिमिति हुन नसक्ने बताउनुभयो । उहाँले विश्वविद्यालयको समग्र विकास र विस्तारमा सबैले हातेमालो गर्नुपर्ने, ठाउँको अभावमा कार्यक्रमको स्तरोन्नति गर्न नसकिएकोले स्थानीय निकायले जग्गा प्राप्ति र मेडिकल कलेजको स्थापनाका लागि पहल गर्ने विश्वास व्यक्त गर्नुभयो ।

कार्यक्रममा स्वागत मन्तव्य राख्दै मानविकी तथा सामाजिकशास्त्र संकायका डीन प्रा.डा. इन्द्रप्रसाद तिवारीले पोखरा विश्वविद्यालय राष्टिय विश्वविद्यालयको रूपमा स्थापित हुनुपर्ने विचार व्यक्त गर्नुभयो । उहाँले विश्वविद्यालयलाई शिक्षाको गुणस्तरमा बलियो बनाउने र नयाँ नयाँ बजारोन्मुख कार्यक्रम सञ्चालन गर्ने, थप्ने आवश्यकता र चुनौति दुबै रहेको चर्चा गर्नुभयो ।

लेखनाथ उद्योग वाणिज्य संघका अक्ष्यक्ष एवम् पोखरा विश्वविद्यालयका सभासद् लक्ष्मी त्रिपाठीले विश्वविद्यालयले उपलब्ध जग्गाको संरक्षण गर्न नसकेकोले सुकुम्बासीको नाममा हुकुमबासीले जग्गा अतिक्रमण गर्दै लगेको उल्लेख गर्नुभयो । विश्वविद्यालयलाई आस्थाको रूपमा भर्तीकेन्द्र बनाउन नहुने उल्लेख गर्दै खुबी र क्षमता भएका मान्छेलाई प्रतिस्पर्धा गराई विश्वविद्यालयमा प्रवेश दिन सकेमा विदेशीने प्रवृत्ति रोकिने विचार व्यक्त गर्नुभयो ।  असल नागरिक, गुणस्तरयुक्त नागरिक र अब्बल नागरिक उत्पादन गर्ने तथा विश्वविद्यालयलाई शान्त र मर्यादित तुल्याउने विश्वविद्यालयको प्रमुख उद्देश्य हुनुपर्ने उहाँको कथन थियो ।

विश्वविद्यालयको वार्षिकोत्सव समारोहमा मन्तव्य राख्दै पोखरा लेखनाथ महानगपालिका वडा नं. ३० का वडाध्यक्ष श्रीराम पोखरेलले विश्वविद्यालयले लेखनाथबासीको गुनासा र सुझावलाई कदर गरी उचित निकास दिनुपर्ने उल्लेख गर्नुभयो । उहाँले विश्वविद्यालयले स्थानीय तहको विकासमा पनि ध्यान दिनुपर्ने विचार राख्दै प्रदुषण र वातावरणीय संरक्षण लगायतका कार्यमा विश्वविद्यालयसँग सहकार्य गर्न वडा सँधै तयार रहेको उल्लेख गर्नुभयो । विश्वविद्यालयको स्थापना र संरक्षण गर्ने कार्यमा अहम् भूमिका निर्वाह गर्ने तत्कालीन जनप्रतिनिधि, जग्गा दाता, राजनीतिक प्रतिनिधि, समाजसेवाी आदिलाई विश्वविद्यालयले भूल्न नहुने उहाँको तर्क थियो ।

पोखरा विश्वविद्यालय प्राध्यापक संघका अध्यक्ष उपप्राध्यापक निराजन बमले राजनीतिक भागबण्डालाई विश्वविद्यालयले कुनैपनि हालतमा प्रश्रय दिन नहुने उल्लेख गर्दै हरेक नियुक्तिलाई योग्यता र क्षमताको प्रतिस्पर्धात्मक आधारमा नियुक्ति गर्ने मापदण्ड तय गर्नुपर्ने विचार राख्नुभयो । शिक्षक कर्मचारीको वृत्ति विकासको अवसरका लागि विश्वविद्यालयले कन्जुस्याई गर्न नहुने उहाँको तर्क थियो ।  

एनआईसी एशिया बैंक गण्डकी धौलागिरीका क्षेत्रीय प्रबन्धक दिपेन्द्र शर्माले आँफू पोखरा विश्वविद्यालयको भूतपूर्व छात्र रहेको उल्लेख गर्दै गुणस्तरीय शिक्षा प्रदान गरी दक्ष जनशक्ति उत्पादन गर्ने कार्यमा विश्वविद्यालयलाई अझै सफलता मिलोस् भनि कामना गर्नुभयो । विश्वविद्यालयसितको सम्बन्धलाई प्रगाढ तुल्याउन र विश्वव्यापी उष्णतालाई कम गर्न एनआइसी एशिया बैंकले बृक्षारोपणको अभियान सञ्चालन गरेको उल्लेख गर्नुभयो । शर्माले व्यवस्थापन संकायमा उत्कृष्ट उच्चतम अंक ल्याई उत्तीर्ण हुने ३ जना छात्रछात्रालाई हरेक वर्ष बैंकमा रोजगारी दिने र शिक्षक कर्मचारीलाई बिना धितो ऋण सहुलियत दिने घोषणा समेत गर्नुभएको थियो ।

पोखरा विश्वविद्यालय कर्मचारी संघका अध्यक्ष शिवराज पण्डितले विश्वविद्यालयमा कार्यरत शिक्षक कर्मचारीलाई उत्प्रेरणाको तालिम, पुरस्कार र दण्डको व्यवस्थापन गर्नुपर्ने विचार राख्नुभएको थियो । कार्यक्रमको सञ्चालन योजना तथा कार्यक्रम महाशाखा प्रमुख सहप्राध्यापक ज्ञानेश्वर शर्माले गर्नुभएको थियो ।