अनुसन्धान केन्द्रद्वारा “रिसर्च टक” कार्यक्रम आयोजना !!!

२०७८ साल कात्तिक १४ गते आइतबार, पोखरा, कास्की ।
पोखरा विश्वविद्यालय अनुसन्धान केन्द्रले पोखरा विश्वविद्यालय स्वास्थ्य विज्ञान सङ्काय र स्कूल अफ हेल्थ एण्ड एलाईड साइन्सेजसँग सहकार्य गरी स्कूल अफ बिजनेश, पोखरा विश्वविद्यालयको भवनमा अवस्थित इन्फरमेशन एक्सेस सेण्टरमा एक “रिसर्च टक” कार्यक्रमको शुरूवाती पहिलो श्रृंखला आयोजना गर्यो । ट्रान्सप्लान्ट सर्जरी, क्यालिफोर्निया विश्वविद्यालय, सान फ्रान्सिस्को अमेरिकाको शल्यक्रिया विभागका सह–प्राध्यापक डा. तारा सिग्देललाई प्रमुख वक्ताको रूपमा आमन्त्रण गरिएको उक्त कार्यक्रममा पोखरा विश्वविद्यालयका उपकुलपति प्रा.डा. प्रेमनारायण अर्याल, रजिष्ट्रार डा. दिपकबहादुर भण्डारी लगायत विभिन्न संकायका डीनहरू तथा स्वास्थ्य विज्ञान सङ्काय र स्कूल अफ हेल्थ एण्ड एलाईड साइन्सेजका प्राध्यापक, पदाधिकारी आदिको उपस्थिति रहेको थियो ।

कार्यक्रमका सभापति एवम् उपकुलपति प्रा.डा. प्रेमनारायण अर्यालले जबसम्म विश्वविद्यालयमा अनुसन्धान गतिविधि सँगसँगै पठनपाठन हुँदैन, त्यस्तो शिक्षामा गुणस्तर नहुने र त्यसले देशको योजनाबद्ध विकासका लागि थिंक टैंक समेत नजन्माउने उल्लेख गर्नुभयो । उपकुलपतिले पोखरा विश्वविद्यालयलाई अग्रणी विश्वविद्यालयको रूपमा स्थापित गर्न प्राध्यापकहरूमा अनुसन्धान तथा नविनतम सोच आवश्यक छ भन्दै “तपाईहरू अनुसन्धानतर्फ लाग्नुस्, आवश्यक साधन, स्रोत र सहयोग हामी जुटाउँछौं” उपकुलपतिले भन्नुभयो ।

कार्यक्रमका प्रमुख वक्ता डा. तारा सिग्देलले “रिसर्च एण्ड इनोभेशन इन हाइअर एजुकेशन–एन ईलुसिभ बट क्रिटिकल कम्पोनेन्ट ईन पोष्ट कोभिड इरा” शिर्षकमा प्रस्तुतिकरण गर्नुभएको थियो । उहाँले बायोइन्फरमेटिक्स, बायोमार्कर डिसकभरी, हाई थ्रोपुट डाटा, इमुनोलोजी, किड्नी ट्रान्सप्लान्टेशन, लिभर क्यान्सर, अर्गान ट्रान्सप्लान्टेशन, प्रोटियोमिक्सका बारेमा संक्षिप्त प्रस्तुति गर्नु भएको थियो ।

पोखरा विश्वविद्यालयको अनुसन्धान गतिविधिलाई अधिक व्यावहारिक र उपयोगी तुल्याउँदै गुणस्तरीय शिक्षाका लागि पोखरा विश्वविद्यालय अनुसन्धान केन्द्रले हरेक महिना विभिन्न शिर्षकमा “रिसर्च टक” कार्यक्रमलाई निरन्तरता दिने बताएको छ । कार्यक्रमको सञ्चालन पोखरा विश्वविद्यालय अनुसन्धान केन्द्रका कार्यकारी निर्देशक सह–प्रा.डा. नमराज धामीले गर्नुभएको थियो ।

कार्यक्रमका तस्विरहरूः

« ‹ of 4 › »

उद्यमशीलता विकासका लागि पोखरा विश्वविद्यालय, मानविकी तथा सामाजिक शास्त्र संकाय र नबिल बैंक लिमिटेडबीच सम्झौता पत्रमा हस्ताक्षर

२०७८ साल कात्तिक १२ गते शुक्रबार, पोखरा, कास्की ।
पोखरा विश्वविद्यालयमा सञ्चालित उद्यमशीलता विकास कार्यक्रमको चार वर्षे स्नातकतहमा अध्ययन गर्न चाहने विद्यार्थीहरूलाई अध्ययन गर्न तथा अध्ययन पश्चात उद्यम÷व्यवसाय सञ्चालन गर्न सहजीकरण गर्ने उद्देश्यले पोखरा विश्वविद्यालय र नबिल बैंक लिमिटेडबीच एक समझदारीपत्रमा हस्ताक्षर सम्पन्न भयो । पोखरा विश्वविद्यालयका उपकुलपति प्रा.डा. प्रेमनारायण अर्याल तथा रजिष्ट्रार डा. दिपकबहादुर भण्डारीको समुपस्थितिमा भएको हस्ताक्षर समारोहमा पोखरा विश्वविद्यालय मानविकी तथा सामाजिक शास्त्र संकाय डीन, सह–प्रा. डा. अजय थापा र नबिल बैंक लिमिटेडका प्रमुख कार्यकारी अधिकृत अनिल केशरी शाहले उक्त समझदारीपत्र (एमओयू) मा हस्ताक्षर गर्नु भएको थियो ।

हस्ताक्षर समारोहलाई उद्घाटनसहित सम्बोधन गर्दै कार्यक्रमका प्रमुख अतिथि एवम् पोखरा विश्वविद्यालयका उपकुलपति प्रा.डा. प्रेमनारायण अर्यालले विश्वविद्यालयले देशलाई आवश्यक पर्ने उद्यमीहरू जन्माउने कार्यलाई अभियानको रूपमा लैजाने बताउनुभयो । उहाँले परम्परागत शैलीको पठनपाठनमा आमूल परिवर्तन गरी विद्यार्थीहरूलाई उद्यमशिलतामा आकर्षित ज्ञान र सीप दिने उद्देश्यले नेपालमै पहिलोपटक उद्यमशिलता विकासमा पठनपाठन शुरू गरिएको बताउनुभयो ।

कार्यक्रमका विशेष अतिथि एवम् पोखरा विश्वविद्यालयका रजिष्ट्रार सह–प्रा.डा. दिपकबहादुर भण्डारीले विद्यार्थीले जागिर खोज्ने नभई रोजगारी सिर्जनाका लागि पढ्नुपर्नेमा जोड दिनु भयो । उहाँले नबिल बैंकले बिना धितो उत्कृष्ट व्यापार योजनालाई प्राथमिकता राखेर ऋण प्रभाव गरे उद्यमशिल विकासलाई सहयोग पुग्ने बताउनुभयो ।

नबिल बैंक लिमिटेडका प्रमुख कार्यकारी अधिकृत अनिल केशरी शाहले अरूले रोपेको रूखको फल खाएर सन्तुष्टि भएको नबिल बैंकलाई फलको कुनै कमी नभएको उल्लेख गर्नुभयो । उहाँले नेपालका ठूला ठूला उद्यमीहरू नबिल बैंकको ग्राहक भएको उल्लेख गर्दै बैंकमा यथेष्ट रकम डिपोजिट रहेको तर बैंकको दिगो विकासका लागि उद्यमीलाई रोजगार दिने सहयात्री खोज्दै गर्दा पोखरा विश्वविद्यालय जस्तो उत्कृष्ट संस्था भेटिएकोले आफू र आफ्नो टिमलाई निकै सन्तुष्टि प्राप्त भएको उल्लेख गर्नुभयो । शाहले इन्टर्नशिप सामाजिक सेवा होइन भन्दै विद्यार्थीलाई इन्टर्नशिपका लागि बैंक नभई जहाँ बुद्धि, विवेक, पसिना बगाउने उद्यमीहरू छन् त्यहाँ जानुपर्नेमा जोड दिनुभयो । पोखरा विश्वविद्यालयले शुरू गरेको ब्याचलर अफ ईन्ट्रिप्रिन्यूरशीप डेभलपमेन्ट कार्यक्रम देशलाई सबैभन्दा आवश्यक रहेको तर्क गर्दै शाहले पेटको आगो र आर्थिक अभावले विदेशीने विद्यार्थीलाई यस कार्यक्रममार्फत नयाँ विचार र योजनासहित आएमा नबिल बैंकले पूर्ण सहयोग र साथ दिने बताउनु भयो । तर जागिर पाए खाने र व्यापार व्यवसाय पनि गर्ने विद्यार्थीलाई यस क्षेत्रमा नलाग्न समेत उहाँले सुझाउनु भयो ।

हस्ताक्षर समारोहमा पोखरा विश्वविद्यालय मानविकी तथा सामाजिक शास्त्र संकायका डीन सह–प्रा.डा. अजय थापाले पोखरा विश्वविद्यालयल र ब्याचलर अफ ईन्ट्रिप्रिन्यूरशीप डेभलपमेन्ट कार्यक्रमको बारेमा प्रस्तुति गर्नुभएको थियो भने नबिल बैंक लिमिटेडका गण्डकी प्रदेश प्रमु्ख सूर्य बहादुर रोकाले स्वागत मन्तव्य राख्नुभएको थियो । यस्तै गरी नबिल बैंक लिमिटेडका दिगो बैंकिङ्ग विकासका प्रबन्धक लिला प्रसाद ओझाले नबिल बैंक लिमिटेड र एमओयूको मुख्य पक्षबारे प्रस्तुति गर्नुभएको थियो । त्यस्तै उद्योग, वाणिज्य तथा आपूर्ति मन्त्रालय अन्तर्गतको मेडपा कार्यक्रमका राष्ट्रिय परियोजना प्रबन्धक डा. रामजी प्रसाद न्यौपानेले कार्यक्रममा विशेष टिप्पणी प्रस्तुत गर्नुभएको थियो ।

दुई संस्थाबीचको सहयोगको क्षेत्रमा नबिल बैंकले उद्यमशीलता विकासमा चारवर्षे स्नातकतह (ब्याचलर अफ ईन्ट्रिप्रिन्यूरशीप डेभलपमेन्ट) कार्यक्रममा अध्ययरत तथा उत्तीर्ण विद्यार्थीहरूले सञ्चालन गरेका जस्तैः विभिन्न कृषि व्यवसायमा संलग्न व्यक्तिगत एवम् सामूहि लगानीमा सञ्चालनमा रहेका र नयाँ सञ्चालन गरिने फर्म परियोजनाहरूलाई नबिल किसान कर्जा, कृषि, वन, व्यापार, उत्पादन, सेवा क्षेत्र आदिमा संलग्न सञ्चालित र नयाँ सञ्चालन गरिने विभिन्न लघु, साना तथा मझौला उद्यमहरूका लागि नबिल उद्यमशील कर्जाका साथै ब्याचलर अफ ईन्ट्रिप्रिन्यूरशीप डेभलपमेन्ट कार्यक्रम अध्ययन गर्न इच्छुक विद्यार्थीलाई उच्चशिक्षा उच्चशिक्षा कर्जा र शिक्षित युवा स्वरोजगार कर्जा प्रदान गर्नेछ ।

१०+२ पास गरेका विद्यार्थीले उच्च शिक्षा अध्ययन गर्न चाहेमा उच्चशिक्षा कर्जा अन्तर्गत उच्च प्राविधिक/व्यावसायिक शिक्षाका लागि पाँच वर्षको अवधिमा चुक्ता गर्नुपर्ने पाँचलाखसम्मको कर्जा नबिल बैंकले प्रवाह गर्नेछ भने शिक्षित युवा स्वरोजगार कर्जा पनि पाँच वर्षको अवधिमा चुक्ता गर्ने गरी अधिकतम सातलाखसम्म प्रदान गरिनेछ ।

किसान कर्जामा व्यक्तिगत व्यवसायका लागि १५ लाखसम्म, फर्मका लागि २५ लाखसम्म र सामूहिकमा पाँच लाख प्रति सदस्य प्रदान हुनेछ । पाँच वर्षसम्मको अवधि भएको किसान कर्जामा एक वर्षभन्दा कम नगद प्रवाह चक्र भएको व्यवसायका लागि छोटो अवधि कर्जा (एसटिएल) र सोभन्दा माथिको आवधिक कर्जाका रूपमा प्रवाह हुनेछ ।

विश्वविद्यालयले समय समयमा आफ्ना ब्याचलर अफ ईन्ट्रिप्रिन्यूरशीप डेभलपमेन्ट कार्यक्रममा अध्ययरत तथा उत्तीर्ण विद्यार्थीहरूलाई बित्ती विद्यार्थी र स्नातकहरूलाई वित्तीय साक्षरता÷उत्पादन अभिमुखीकरण कार्यक्रम सञ्चालन गर्न प्लेटफर्महरू उपलब्ध गराउने तथा त्यस्ता विद्यार्थीहरूको डाइरेक्टरी/डेटाबेस उपलब्ध गराएर बैंकको वित्तीय क्षेत्रलाई सहज तुल्याउनेछ ।

पोखरा विश्वविद्यालय र उद्योग, वाणिज्य तथा आपूर्ति मन्त्रालयको सहकार्यमा नेपालमै पहिलो पटक पोखरा विश्वविद्यालयको मानविकी तथा सामाजिश शास्त्र संकाय अन्तर्गत स्कूल अफ डेभलपमेन्ट एण्ड सोसल ईञ्जिनियरिङ्गमा गत वर्षदेखि वेचलर अफ ईन्ट्रिप्रिन्यूरशीप डेभलपमेन्ट कार्यक्रम सञ्चालनमा आएको थियो ।

कार्यक्रमका तस्विरहरू

« ‹ of 8 › »

डीनको नेतृत्वमा अवलोकन भ्रमण सम्पन्न !!!

२०७८ असोज २४ गते आइतबार, पोखरा–३०, कास्की ।
पोखरा विश्वविद्यालय मानविकी तथा सामाजिकशास्त्र संकायका डीन सह–प्राध्यापक डा. अजय थापाको नेतृत्वमा स्कूल अफ बिजनेशका स्कूल निर्देशक उप–प्राध्यापक डा. सृजन ज्ञवाली, सह–प्राध्यापक डा. सूर्यबहादुर जि.सि. र ईस्पट ग्रुपका निर्देशक श्री साकार जंग शाहीसहितको टोलीले ४ देखि ७ अक्टुबर, २०२१ मा भारतको अहमदाबादस्थित रिसर्च, इनोवेशन, बिजनेश इक्कुवेशन र इन्ट्रिप्रिन्यूरसिप डेभलपमेन्ट सेन्टरको अवलोकन भ्रमण सम्पन्न गरेको छ ।

स्वर्णिम स्टार्टअप एण्ड इनोवेशन यूनिवसिर्टी, अहमदाबाद, भारतको आमन्त्रणमा भएको उक्त अवलोकन भ्रमणमा स्टार्टअप एण्ड इनोवेशन यूनिवसिर्टीको स्वर्णिम इन्कुवेशन सेन्टर, अरिहंत स्कूल अफ फार्मेसी एण्ड वायो रिसर्च इन्स्टिच्यूट, भारत सरकारले नयाँपुस्तामा उद्यमशिलता विकास गर्ने उद्देश्यले स्थापना गरेको इन्टरनेशनल सेन्टर फर इन्ट्रिप्रिन्यूरसिप एण्ड टेक्नोलोजी (icreate) र अहमदाबाद म्यानेजमेन्ट एशोसिएशन (AMA) मा अवलोकन भ्रमण तथा रिसर्च, इनोवेशन, बिजनेश इक्कुवेशन, इन्ट्रिप्रिन्यूरसिप डेभलपमेन्ट र अन्तर्राष्टिय सहयोगसँग सम्बन्धित विषयवस्तुहरूमा छलफल भएको थियो । अवलोकन भ्रमण तथा छलफलमा स्वर्णिम स्टार्टअप एण्ड इनोवेशन यूनिवसिर्टीका भाइस प्रेसिडेन्ट अदि रिसभ जैन, प्रोवोष्ट प्रोफेसर डा. कात्तिक जैन, महानिर्देशक रागिन शाह, इक्कुवेशन सेन्टर प्रमुख श्री दिप मेहता, आइक्रिएटका कार्यकारी निर्देशक अनुपम जलोटे लगायतका पदाधिकारी, निकाय प्रमुखहरूको सहभागिता रहेको थियो ।

अवलोकन भ्रमणका केहि तस्विर

उपकुलपतिद्वारा अन्तर्राष्टिय अनुसन्धान केन्द्र तथा आवास गृह शिलान्यास !!!

२०७८ असोज २२ गते शुक्रबार, पोखरा–३०, कास्की ।
पोखरा विश्वविद्यालयका उपकुलपति प्रा.डा. प्रेमनारायण अर्यालले पोखरा विश्वविद्यालय प्राङ्गणमा निर्माण हुन लागेको अत्याधुनिक अन्तर्राष्टियस्तरको अनुसन्धान केन्द्र तथा आवास गृहको आज एक समारोहबीच शिलन्यास गर्नुभयो । समारोहका प्रमुख अतिथि तथा वैदिक कार्यका प्रमुखकर्ता उपकुलपति प्रा.डा. अर्यालले विहान ७ः३० बजेको शुभमुहर्त पारेर उक्त भवन शिलान्यास गर्नुभएको हो ।

शिलान्यासपछिको कार्यक्रमलाई सम्बोधन गर्दै उपकुलपति अर्यालले विश्वविद्यालयलाई सबैले पवित्र स्थलको रूपमा विकास गर्नुपर्नेमा जोड दिंदै यसको विकास भएमा मात्र समाजको विकास हुने बताउनुभयो । उपकुलपतिले विश्वविद्यालयमा नयाँ नयाँ अनुसन्धान र परिवर्तनको अझ बढी खाँचो छ भन्दै यसको उत्थानका लागि ओपनले निर्माण गर्न लागेको अन्तर्राष्टिय अनुसन्धान केन्द्र तथा आवास गृहले विश्वविद्यालयलाई थप उचाईमा लैजाने विश्वास व्यक्त गर्नुभयो ।

कार्यक्रमलाई सम्बोधन गर्दै पोखरा विश्वविद्यालयका रजिष्ट्रार डा. दिपकबहादुर भण्डारीले विश्वविद्यालय सबैको साझा संस्था भएकोले यसको विकासमा सबै एकै ठाउँ र समूहमा बसेर काम गर्नुपर्नेमा जोड दिनुभयो । उहाँले सम्बन्धनप्राप्त कलेजहरू विश्वविद्यालयको एउटै परिवार भएकोले ती कलेजहरूको साथ र सहयोग विश्वविद्यालयको विकास र विस्तारका लागि महत्वपूर्ण हुने बताउनुभयो । पोखरा विश्वविद्यालय स्थानीयबासीको सोचले निर्माण भएको उल्लेख गर्दै उहाँले स्थानीयबासीको शिक्षा, स्वास्थ्यमा विश्वविद्यालयले ध्यान दिने बताउनुभयो ।

विश्वविद्यालयको व्यवस्थापन संकाय डीन डा. दयाराज ढकालले ओपनको सहकार्यमा निर्माण हुन लागेको अनुसन्धान तथा आवास गृह विश्वविद्यालय परिवार र समाजको लागि एक उत्कृष्ट कार्य भएको र यसको निर्माण सहयोगमा सबैको एउटै भाव देखिएकोले समयमै सम्पन्न हुनेमा विश्वास व्यक्त गर्नुभयो ।

कार्यक्रममा मन्तव्य राख्दै ओपनका अध्यक्ष एवम् नोबेल कलेजका संस्थापक/प्राचार्य नवराज पाण्डेले पोखरा विश्वविद्यालयको विकास भएमा स्वतः यस क्षेत्रको व्यापार, व्यवसाय, पर्यटन आदि फस्टाउने उल्लेख गर्नुभयो । उहाँले पोखरा विश्वविद्यालयको विकासमा स्थानीयबासी र यसका सरोकारवालाहरूको महत्वपूर्ण योगदान रहेको चर्चा गर्दै सबैको भावना समेटी समयअनुसार विश्वविद्यालय परिवर्तन हुँदै जानुपर्नेमा जोड दिनुभयो । विश्वविद्यालय सार्वजनिक निजी साझेदारी मोडेलमा अगाडि बढेमा मात्र यसले उचाई लिने उल्लेख गर्दै पाण्डेले यसैलाई मध्यनजर गर्दै ओपनले सानो एउटा इट्टा थप्ने कार्य मात्र गरेको बताउनुभयो ।

शिलान्यास कार्यक्रममा आफ्नो मन्तव्य राख्दै अक्सफोर्ड कलेज अफ ईञ्जिनियरिङ्ग एण्ड म्यानेजमेन्टका संस्थापक/प्राचार्य तथा भवन निर्माण समितिका संयोजक ई. हरि भण्डारीले पोखरा विश्वविद्यालयको उचाई नबढेसम्म सम्बन्धनप्राप्त कलेजहरूको पनि उचाई नबढ्ने भएकोले विश्वविद्यालयलाई अति आवश्यक ठानी भवन निर्माण गर्न लागेको जानकारी दिनुभयो । उहाँले अनुसन्धान र अन्तर्राष्टिय सम्बन्ध राम्रो भएमा मात्र विश्वविद्यालयले उचाई लिने बताउनुभयो । उहाँले विश्वविद्यालयमा अहिले राम्रो टिम रहेकोले अहिले विश्वविद्यालय नबने भविश्यमा कहिल्यै नबन्ने बताउनुभयो ।

लेखनाथ नगरपालिकाका पूर्व मेयर विष्णु पोखरेलले स्थानीयबासीले पोखरा विश्वविद्यालयको लागि छुट्टाइएको २७४० रोपनी जग्गाका लागि पञ्चायती कालमा २ करोड जुटाएको स्मरण गराउँदै उहाँले त्यसरी जुटाएको जमिन विश्वविद्यालयले संरक्षण र सम्बर्धन गर्न नसकेकोमा दुःख व्यक्त गर्नुभयो ।

पोखरा महानगरपालिका वडा नं. ३० का वडा अध्यक्ष श्रीराम पोखरेलले स्थानीयबासी र यसक्षेत्रका आम नागरिकले धेरै दुःखका साथ पोखरा विश्वविद्यालय जन्माएको हो भन्दै यसले जन चाहना अनुसार अपेक्षित गति लिन नसकेकोमा चिन्ता व्यक्त गर्नुभयो । पोखरेलले सुकुम्बासी लगायत नदी कटानबाट जग्गाको संरक्षण गर्न विश्वविद्यालय आफै लाग्नुपर्नेमा जोड दिनुभयो । उहाँले यस भेकका लागि एउटा अस्पताल निकै खाँचो रहेको उल्लेख गर्दै जति सक्दो चाँडो विश्वविद्यालयले एउटा अस्पताल निर्माण गरेमा यस भेकका जनता विजयपुर कटेर पोखरा उपचार गर्न जानु नपर्ने बताउनुभयो । कार्यक्रमको सञ्चालन कामु उपप्रशासक रोशन पाण्डेले गर्नु भएको थियो ।

अंग्रेजीमा “ओपन इन्टरनेशनल रिसर्च सेन्टर एण्ड गेष्ट हाउस” नामाकरण दिइएको उक्त भवन पोखरा विश्वविद्यालय शिक्षण संस्थाहरूको संघ, नेपाल (ओपन) ले पोखरा विश्वविद्यालय २५ औं वर्ष पुगेको उपलक्ष्यमा मनाउन गइरहेको रजतजयन्तीको अवसरमा पोखरा विश्वविद्यालयसँग सहकार्य गरी निर्माण गर्न लागेको हो ।

करिब १२ करोडको लगानीमा निर्माण हुने उक्त भवन विश्वविद्यालयको प्राङ्गण लेखनाथमा अवस्थित ११४ रोपनी प्लटको डि ब्लकमा निर्माण हुनेछ । करिब चारहजार वर्गफिट प्रतितलाका दरले सम्पूर्ण पूर्वाधारसहित चारतले भवन निर्माण सम्पन्न गरी दुई वर्षभित्र पोखरा विश्वविद्यालयलाई पूर्णरूपमा हस्तान्तरण गर्ने कार्य योजना छ । भवनमा सबै गरेर सुविधा सम्पन्न ३३ ओटा कोठा, हलहरू छन् ।

अन्तर्राष्टियस्तरको अनुसन्धान केन्द्र तथा आवास गृहमा रहने कोठा तथा हलहरूः

भूई तलामा एउटा रिसेप्सन हल, एउटा प्रतिक्षालय, दुईओटा प्रशासकीय कक्ष, दुईओटा डाईनिङ्ग हल, भण्डार कोठासहितको एउटा भान्छाकोठा गरी जम्मा ८ ओटा कोठाहरू हुनेछन् । पहिलो तलामा दुईओटा प्रतिक्षालय, दुई ओटा डबल गेष्ट रूम, चार ओटा डिलक्स गेष्ट रूम र एउटा फेमिली गेष्ट रूम गरी जम्मा ९ ओटा कोठा हुनेछन् । दोस्रो तलामा एउटा रिसेप्सन हल, एउटा प्रतिक्षालय, एउटा इन्टरनेशनल रिलेशन अफिस, दुईओटा डिलक्स गेष्ट रूम, एउटा फेमिली डिलक्स गेष्ट रूम, ठूलो साइजको एउटा प्रिजेनटेशन हल गरी जम्मा ८ ओटा कोठा हुनेछन् । तेस्रो तलामा एउटा प्रतिक्षालय, एउटा भिआईपि प्रिजेनटेशन हल, दुई ओटा सानो साइजको मुख्य प्रिजेनटेशन हल र एउटा अतिरिक्त ठूलो साइजको मुख्य प्रिजेनटेशन हल गरी जम्मा ५ ओटा कोठाहरू हुनेछन् । चारतलामा एउटा स्टोर रूम र दुई ओटा खुला टेरेस निर्माण गरिने छ ।

पोखरा विश्वविद्यालयको समग्र उन्नयन एवम् शैक्षिक तथा अनुसन्धानात्मक वातावरणलाई विश्वस्तरीय बनाई विश्वविद्यालयको छवि उच्च बनाउने उद्देश्यस्वरूप विश्वविद्यालयबाट सम्बन्धन प्राप्त ५८ ओटा कलेजहरूले अन्तर्राष्टियस्तरको अनुसन्धान केन्द्र तथा आवास गृह निर्माण गर्न लागेका हुन ।

पोखरा विश्वविद्यालय नेपालकै उत्कृष्ट विश्वविद्यालयको बाटोमा लम्किरहेको अवस्थामा यसलाई विश्वविद्यालयसँग सम्बन्धित सम्पूर्ण निकायहरूबीच सकारात्मक रूपबाट सहकार्य गर्ने आवश्यकतालाई मध्यनजर गर्दै ओपनले पोखरा विश्वविद्यालयको प्राज्ञिक महत्वलाई उचो राख्न तथा विश्वविद्यालयको वृत्तिविकासमा सहकार्य गर्न भवन लगायतका सम्पूर्ण पूर्वाधार तयार गरी हस्तान्तरण गर्ने बताएको छ । पोखरा विश्वविद्यालयले यसलाई सकारात्मक कदम भन्दै उच्च सम्मान गरेको छ ।

कार्यक्रमका तस्विरहरू

विश्वविद्यालयको केन्द्रीय प्रशासनिक भवन विस्तार कार्य अन्तिम चरणमा !

२०७८ असोज २० गते बुधबार, पोखरा–३०, कास्की ।
पोखरा विश्वविद्यालय केन्द्रीय प्रशासनिक भवन विस्तार अन्तिम चरणमा पुगेको छ । ८ कारोड भन्दा बढी लागतमा निर्माण गरिने उक्त परियोजनालाई विश्वविद्यालयमा आज आयोजित एक कार्यक्रममा परामर्शदाता र ईञ्जिनियरहरूद्वारा जानकारी दिइएको हो । विश्वविद्यालयका उपकुलपति प्रा.डा. प्रेमनारायण अर्याल, रजिष्ट्रार डा. दिपकबहादुर भण्डारी लगायत संकायका डीन, निर्देशक, प्रमुख पदाधिकारीहरू आदिको उपस्थिति रहेको उक्त कार्यक्रममा हालको मौजुदा दुईतले नयाँ केन्द्रीय प्रशासनिक भवनलाई सुधार गर्ने र त्यसमाथि दुईतला थप गरी चारतले बनाउने, प्रतीकात्मक आकर्षक डिजाइनको केन्द्रीय प्रवेशद्वार निर्माण गर्ने तथा आन्तरिक सडक, फुटपाथ, ड्रेनेज, बगैचा र पार्किङ्ग लगायतको निर्माण योजनाको मस्यौदा प्रस्तुतिकरण गरिएको थियो । केन्द्रीय प्रशासनिक भवन विस्तार लगायत अन्य कार्यको डिजाइन, ड्रइङ्गसम्बन्धी सम्पूर्ण कार्य र त्यसको मूल्यांकन सम्पन्न भएपछि ठेक्कामा गई यसै वर्षको माघदेखि निर्माण कार्य शुरू हुनेछ र २०८० सालको मध्यसम्म सबै कार्य सम्पन्न गरिने लक्ष्य छ ।

विश्वविद्यालयले यस वर्ष विभिन्न कार्यक्रम गरी रजतजयन्ती मनाउँदै गर्दा विभिन्न किसिमका निर्माण परियोजनासहित शिक्षण अस्पताल सञ्चालनलाई प्रमुख प्राथमिकतामा राखी अगाडि बढिरहेको छ ।

शुभकामना आदान-प्रदान कार्यक्रम सम्पन्न !!!

२०७८ असोज १९ गते मङ्गलबार, पोखरा–३०, कास्की ।
पोखरा विश्वविद्यालयले बडादशै, तिहार, छठ–२०७८ तथा नेपालसम्वत् ११४२ को उपलक्ष्यमा आज एक कार्यक्रमको आयोजना गरी शुभकामना आदानप्रदान गरेको छ । उक्त कार्यक्रमलाई सम्बोधन गर्दै विश्वविद्यालयका उपकुलपति प्रा.डा. प्रेमनारायण अर्यालले विश्वविद्यालयमा राम्रा कामको भन्दा नराम्रा र अपुस्ट हल्लाहरूले विश्वविद्यालयको विकास र विस्तारमा बाधा उत्पन्न गरेको बताउनुभयो । उहाँले सत्य र तथ्यको मात्र विश्वास गरी मनभित्रका विकार निकालेर सकारात्मक सोचले अगाडि बढ्न सबैलाई आग्रह समेत गर्नुभयो । उपकुलपतिले विकास रफ्तारमा नहुने भन्दै एकपछि दुई, दुईपछि तीन र तीनपछि चार गेयरजस्तै विस्तारै हुने बताउनुभयो ।

विश्वविद्यालयका रजिष्ट्रार डा. दिपकबहादुर भण्डारीले विश्वविद्यालय राष्ट्रका कर्णधार उत्पादन गर्ने थलो भएकोले नयाँ र उत्पादमुखी कार्यक्रम सञ्चालन गरी विद्यार्थी संख्या बढाइने जानकारी दिनुभयो । उहाँले विश्वविद्यालयको विकासका लागि भौतिक पूर्वाधार अपरिहार्य भएकोले यसतर्फ विश्वविद्यालयले विशेष ध्यान दिएको बताउनुभयो । साथै उहाँले विश्वविद्यालय सबैको साझा चौतारी भएकोले यसमा लुकेर छिपेर कुनै पनि अहितकारी कार्यहरू नगरिने बताउनुभयो ।

पोखरा विश्वविद्यालय विज्ञान तथा प्रविधि सङ्कायका डीन सहप्राध्यापक राजेकुमार ठगुराठी, अनुसन्धान केन्द्रका कार्यकारी निर्देशक सहप्राध्यापक डा. नमराज धामी, परीक्षा नियन्त्रक सहप्राध्यापक डा.तुल्सीराम भण्डारी, योजना तथा कार्यक्रम महाशाखा प्रमुख सहप्राध्यापक डा. दिपकराज पौडेल, स्कूल अफ ईञ्जिनियरिङ्गका स्कूल निर्देशक उपप्राध्यापक ओमप्रसाद गिरी तथा पोखरा विश्वविद्यालय प्राध्यापक संघका अध्यक्ष उपप्राध्यापक हेमराज पाण्डे र कर्मचारी संघका अध्यक्ष उपप्रशासक शिवराज पण्डितले चाड पर्वहरूमा विश्वविद्यालय परिवार एकजुट भएर एकै ठाउँमा मनाउनुपर्ने औल्याउँदै दशै तिहार, छठबाट सबैलाई असत्यमाथि सत्यको जीत र कुमार्गबाट सत्मार्गतर्फ अगाडि बढ्ने प्रेरणा र उर्जा मिलोस् भन्ने शुभकामना व्यक्त गर्नुभएको थियो । कार्यक्रमको सञ्चालन सहप्रशासक तारादेवी सापकोटाले गर्नुभएको थियो ।