पोखरा विश्वविद्यालयको रिक्त सेवा आयोगको अध्यक्ष पदमा सह–प्राध्यापक रघुनाथ अधिकारी हालै नियुक्त हुनुभएको छ । उहाँले हाल त्रिभुवन विश्वविद्यालय सेवाबाट अवकाश प्राप्त गर्नुभएको छ । सम्माननीय प्रधानमन्त्री एवम् पोखरा विश्वविद्यालयका कुलपति के.पि. शर्मा ओलीले पोखरा विश्वविद्यालय ऐन, २०५३ को दफा १४ को उपदफा (१) (क) बमोजिम उहाँलाई उक्त पदमा ४ वर्षका लागि नियुक्त गर्नुभएको हो । सँगसँगै प्रधानमन्त्री ओलिले सोही ऐन बमोजिम सेवा आयोगको रिक्त सदस्य पदमा त्रि.वि., पृथ्वीनारायण क्याम्पसका, पोखराका प्राध्यापक दीपकचन्द्र वाग्लेलाई समेत नियुक्त गर्नुभएको छ । उहाँहरू दुबैलाई पोखरा विश्वविद्यालयका उपकुलपति प्रा. चिरञ्जीवीप्रसाद शर्मा, रजिष्ट्रार गोविन्दप्रसाद शर्माले आज पोखरा विश्वविद्यालय सेवा आयोगको कार्यालय लेखनाथमा एक समारोहबीच पद बहाली गराउनु भयो । उपकुलपति प्रा. चिरञ्जीवीप्रसाद शर्मा तथा रजिष्टार गोविन्द प्रसाद शर्माले नवनियुक्त सेवा आयोगका अध्यक्ष एवम् सदस्यलाई बधाई ज्ञापन गर्दै विश्वविद्यालयको तर्फबाट २४ सै घण्टा सहयोग प्राप्त हुने विश्वास दिलाउनु भएको थियो ।

पद बहालीपछि बोल्दै नवनियुक्त सेवा आयोगका अध्यक्ष रघुनाथ अधिकारीले स्थापनाकालदेखि नै आफू पोखरा विश्वविद्यालयसित परिचित रहेको उल्लेख गर्नुभयो । उहाँले विश्वविद्यालयको आन्तरिक एवम् व्यवस्थापनका विषयमा आफू धेरै जानकार नभएपनि सबैको साथ सहयोग र सद्भाव प्राप्त भएमा आगामी कार्य गर्न सहज हुने विचार व्यक्त गर्नुभयो । नवनियुक्त सेवा आयोग सदस्य प्राध्यापक दीपकचन्द्र वाग्लेले आगामी दिनमा सेवा आयोगले गर्ने काममा विश्वविद्यालय परिवारको सुझाव, सहयोग र सल्लाहका साथ अगाडि बढ्ने प्रतिबद्धता व्यक्त गर्नुभयो । विश्वविद्यालयमा विगत २१ महिनादेखि सेवा आयोग पदाधिकारी विहिन हुँदा शिक्षक कर्मचारीहरूको आन्तरिक एवम् खुला विज्ञापन, स्थायी नियुक्ति एवम् बढुवासम्बन्धी सम्पूर्ण कार्यहरू अबरूद्ध भएका थिए ।

स्कूल अफ बिजनेश, पोखरा विश्वविद्यालयले उच्च शिक्षामा शिक्षण विधि, मूल्यांकनका तरिका तथा स्कोरिङ् प्रविधिहरूमा ३ (तीन) दिने कार्यशालाको आयोजना गरेको छ । उक्त कार्यशालाको उद्घाटन कार्यक्रमका प्रमुख अतिथि एवम् पोखरा विश्वविद्यालयका रजिष्ट्रार गोविन्दप्रसाद शर्माले एक समारोहबीच कार्यक्रम ब्यानरमा दस्तखत गरी शुभारम्भ गर्नुभएको थियो । स्कूल अफ बिजनेशअन्तर्गत रहेको नेपाल कोरिया इन्फरमेशन एक्सेस सेन्टरमा सञ्चालन हुने उक्त कार्यशालाको उद्घाटसत्रलाई सम्बोधन गर्दै रजिष्ट्रार गोविन्द प्रसाद शर्माले शिक्षण विधिलाई गुणस्तर र समयसापेक्ष तुल्याउने दायित्व शिक्षकको रहेको उल्लेख गर्नुभयो । मानविकी तथा सामाजिकशास्त्र संकाय, पोखरा विश्वविद्यालयका डीन प्रा.डा. इन्द्रप्रसाद तिवारी, व्यवस्थापन संकायका डीन प्रा. हरिबहादुर खड्का, स्कूल अफ बिजनेशका स्कूल निर्देशक डा. रविन्द्र घिमिरे, कार्यशालाका संयोजक सह–प्राध्यापक दीपकराज पौडेल तथा स्कूल अफ बिजनेशका उप–प्राध्यापक डा. उमेशसिंह यादवले कार्यक्रमको उपादेयता र महत्वमाथि प्रकाश पार्नुभएको थियो । कार्यशालाको स्रोत व्यक्तिमा काठमाडौं विश्वविद्यालय, स्कूल अफ एजुकेशनका प्रा. बालचन्द्र लुईटेल रहनुभएको छ । कार्यशालामा आंगिक तथा सम्बन्धनप्राप्त महाविद्यालयका दुई दर्जन शिक्षक शिक्षिकाले सहभागिता जनाउने छन् ।