२०७५ जेठ ३०, पोखरा लेखनाथ ।
पोखरा विश्वविद्यालय अनुसन्धान केन्द्रको आयोजना तथा विश्वविद्यालय अनुदान आयोगको सहकार्यमा आज यहाँ ‘प्लेजरिज्म याण्ड रेस्पोन्सिबल कण्डक्ट अन रिसर्च याण्ड पब्लिकेशन (बौद्धिक चोरी तथा अनुसन्धान एवं प्रकाशनमा जिम्मेवारीपूर्ण व्यवहार)’ विषयमा तीन दिने कार्यशाला सम्पन्न भयो ।

कार्यशालाको प्रथम दिन कार्यक्रमको उद्‌घाटन गर्दै पोखरा विश्वविद्यालयका पूर्व उपकुलपति प्रा. डा. केशर जङ बराललेअनुसन्धान प्रकाशनमा जानी वा नजानी पनि हुन सक्ने बौद्धिक चोरीबाट सबै अनुसन्धाताहरू बच्नु पर्ने बताउनुभयो ।  प्रा. बरालले बौद्धिक चोरीका प्रकारका बारेमा चर्चा गर्दै राष्ट्रिय र अन्तर्राष्ट्रिय बौद्धिक चोरीका उदाहरणहरू मार्फत् यसबाट हुने दुष्परिणामका विषयमा समेत सावधान गराउनुभएको थियो ।

पोखरा विश्वविद्यालय ‘इन्स्टिट्युशनल रिभ्यु कमिटि’का अध्यक्ष प्रा. डा. विष्णुराज तिवारीको सभापतित्वमा सम्पन्न उद्‌घाटन सत्रमा पोखरा विश्वविद्यालय मानविकी तथा समाजशास्त्र संकायका डीन प्रा. डा. इन्द्रप्रसाद तिवारीले यस्ता कार्यक्रमहरूले युवा अनुसन्धानकर्ताहरूमा  ठूलो प्रभाव पर्ने बताउँदै यसले भविष्यका अनुसन्धानको गुणस्तर बृद्धि हुने विश्वास प्रकट गर्नुभएको थियो भने पोखरा विश्वविद्यालय प्राध्यापक संघका सभापति हेमराज पाण्डेले कार्यक्रमको सफलताको कामना गर्नुभएको थियो ।

कार्यशालामा वैज्ञानिक अनुसन्धान तथा प्रकाशनका विषयमा आवश्यक पर्ने नैतिक व्यवहारका विभिन्न पक्षहरूमा प्रा. डा. विष्णुराज तिवारी, प्रा. डा. टेकराज ज्ञवाली,  प्रा. डा. विकास केसी, प्रा. डा. अरूण कोइराला,  डा. डमरू पनेरू, डा. अनन्त ढुङ्गाना, राजु पाण्डे, रोजना ढकाल, अतिस कौण्डिन्यायन, अनिल गिरी, निम डीसी, सङ्गम सुवेदी गायतका विज्ञहरूले विभिन्न सत्र तथा छलफल कार्यक्रमहरू सञ्चालन गर्नु भएको थियो । कार्यक्रममा पोखरा  विश्वविद्यालय अनुसन्धान केन्द्रका कार्यकारी निर्देशक सह प्रा. गुलाम मोहम्मद खानले कार्यशालाको उद्देश्य माथि प्रकाश  पार्दै  पोखरा  विश्वविद्यालय अनुसन्धान केन्द्रले भविष्यमा पनि यस्ता कार्यक्रम सञ्चालन गरीरहने बताउनुभएको थियो ।

कार्यशालामा पोखरा विश्वविद्यालयका चारै आङ्गिक स्कूलहरू, क्रिमसन कलेज बुटबल, नोबेल कलेज काठमाण्डौं, मोडर्न टेक्निकल कलेज काठमाण्डौं, गण्डकी मेडिकल कलेज, पृथ्वीनारायण क्याम्पस त्रिवि लगायतका शैक्षिक संस्थाबाट ४० जना प्राध्यापक तथा अनुसन्धानकर्ताहरूले भाग लिनुभएको थियो ।

 

 

स्कूल अफ बिजनेस पोखरा विश्वविद्यालय र नेपाल बैंकर्स एशोसियनको बीच भएको समझदारी बमोजिम स्कूल अफ बिजनेसका स्नातक तथा स्नातकोत्तर तहका विद्यार्थीहरूले “खोलौं बैंक खाता” भन्ने नाराका साथ बैकिगं साक्षरता अभियान जेठ २५, २०७६ गते कास्की जिल्लाको रूपा गाउँपालिका शिवालय मा. वि सिर्कुतानमा एक कार्यक्रमका बीच शुरू भएको छ ।

पोखरा विश्वविद्यालयको आंगिक महाविद्यालय स्कूल अफ बिजनेस, रूपा गाउँपालिका र सनराइज बैंक बीचको त्रिपक्षीय सहकार्यमा “एक घर एक बैंक खाता” भन्ने नेपाल सरकारको नारालाई सफल बनाउने अभिप्रायले यो अभियानको शुरूवात भएको हो । कार्यक्रमको उद्घाटन रूपा गाउँपालिकाका अध्यक्ष श्री नवराज ओझा र स्कूल अफ बिजनेसका निर्देशक डा. रविन्द्र घिमिरेले संयुक्त रूपमा गर्नु भएको थियो ।

रूपा गाउँपालिकाका अध्यक्ष श्री नवराज ओझाले व्यवस्थापन संकायका बिद्यार्थीहरूले, गाउँको जनजीवन, अर्थतन्त्रको अध्ययन गरी व्यवहारिक शिक्षा लिनका लागि गाउँमा आएका र उनिहरू सामाजिक उत्तरदायित्व पूरा गर्न बैंक खाता खोल्ने अभियानमा लागेको जानकारी दिनु भयो । अध्यक्षले आम जनताको बैंक खाता भए पछि समृद्धि देशमा आउनेछ, किनकी आर्थिक गतिविधिहरूमा वृद्धि हुनेछ भन्नु भयो । उक्त दिन ३०० भन्दा बढी खाताहरु खोलिएको थियो ।

२०७६ वैशाख २१, पोखरा । पोखरा विश्वविद्यालय स्कूल अफ हेल्थ याण्ड अलाइण्ड साइन्सेजको आयोजनामा आज स्कूलको स्थापनाकाल देखि हालसम्म स्कूलबाट विभिन्न कार्यक्रम अध्ययन सम्पन्न गरेका पूर्व विद्यार्थीहरूको भेला आयोजित गरियो । भेलाले विश्वविद्यालयको स्थापनादेखि स्वास्थ्यविज्ञान विषयका विभिन्न कार्यक्रम उत्तीर्ण गरेका विद्यार्थीहरूको संघ (अलुम्नाइ असोसिएसन) गठन गर्न सर्वसम्मत रूपमा डा. चन्दन श्रेष्ठको अध्यक्षतामा ९ सदस्यीय तदर्थ समितिसमेत गठन गरेको छ । तदर्थ समितिको उपाध्यक्षमा बिन्दु मल्ल, सचिवमा विजय सुवेदी, सहसचिवमा सन्दिप पहारी, कोषाध्यक्षमा रस्मीता रेग्मी र सदस्यहरूमा मनोज सिग्देल, मदन बराल, नवराज पौडेल र विश्वास सुवेदी हुनुहुन्छ ।

कार्यक्रममा प्रमुख अतिथिको आसनबाट बोल्दै स्कूलका निर्देशक डा. डमरुप्रसाद पनेरुले भेलाले पूर्वविद्यार्थीहरूको संघ (एलुम्नाइ असोसिएसन) स्थापनामा सहजीकरण गर्ने तथा संघको स्थापना पश्चात् स्कूलका पूर्वविद्यार्थी तथा स्कूलका शैक्षिक क्रियाकलापमा बीच राम्रो सामञ्जस्य स्थापित हुने र यसले सबैलाई लाभ हुने बताउनुभयो ।

तदर्थ समितिका नवनिर्वाचित अध्यक्ष डा. चन्दन श्रेष्ठले समितिले यथाशीघ्र संघको विधान मस्यौदा गर्ने, साधारणसभा आयोजना गर्ने तथा संघको वैधानिकरूपमा दर्ता गर्ने प्रक्रिया अघि बढाउने प्रतिबद्धता व्यक्त गर्नुभयो । यसैगरी तदर्थ समितिका उपाध्यक्ष बिन्दु मल्लले अलुम्नाइ असोसिएसनलाई सबै पूर्व विद्यार्थीले आआफ्नो स्थानबाट सहयोग गर्ने विश्वास व्यक्त गर्नुभयो । कार्यक्रममा स्कूल अफ हेल्थ याण्ड अलाइड साइन्सेजबाट बि.फार्म, बि.एस्सि.एमएलटि, बिपिएच, बिएस्सी नर्सिङ, एमफार्म तथा एमपिएच कार्यक्रम उत्तीर्ण गरी बिभिन्न संस्थाहरूका कार्यरत पूर्व विद्यार्थीहरूको सहभागिता रहेको थियो ।

भेला स्कूल अफ हेल्थ याण्ड अलाइड साइन्सेज पोखरा विश्वविद्यालय अलुम्नाइ समितिका संयोजक उप-प्रा. अतिस कौण्डिन्न्यायनको सभापतित्वमा सम्पन्न भएको थियो भने भेलाको सञ्चालन उप-प्रा. विजय सुवेदीले गर्नुभएको थियो ।

पोखरा विश्वविद्यालय विज्ञान तथा प्रविधि संकायको आयोजनामा “विपतमा स्वास्थ्य ईञ्जिनियरिङ्ग” नामक ३ दिने अन्तराष्ट्रिय सम्मेलन शुरू भएको छ । प्राकृति तथा मानव निर्मित भुकम्प, सुख्खापन, बाढी, पहिरो, हिमपहिरो तथा विभिन्न रोग प्रकोप विश्वव्यापि समस्याको रूपमा देखा पर्दै गरेको अवस्थामा यसलाई के कस्ता विधि प्रविधि अपनाएर न्यूनिकरण गर्ने भन्ने विषय सम्मेलनको मुख्य एजेण्डा रहेको छ ।
कार्यक्रमका प्रमुख अतिथि एवम् पोखरा महानगरपालिकाका प्रमुख मानबहादुर जि.सी. ले पानसमा दीप प्रज्ज्वलन गरी सम्मेलनको आज होटल पोखरा ग्रैंडेमा २०७५ साल वैशाख १९ गते बिहीबार उद्घाटन गर्नुभएको थियो । सम्मेलनमा आफ्नो मन्तव्य राख्दै महानगर प्रमुख जि.सी. ले विपत व्यवस्थापन हचुवा र निर्वाहमुखी हुने गरेको उल्लेख गर्दै यसको वैज्ञानिक व्यवस्थापन गरी क्षति न्यूनिकरण गर्नेतर्फ सम्मेलन केन्द्रित हुनुपर्नेमा जोड दिनुभयो । कार्यक्रमका अतिथि एवम् विश्वविद्यालय अनुदान आयोगका अध्यक्ष प्रा.डा. भिमप्रसाद सुवेदीले परम्परागत प्रविधि र सोचाईबाट विपत व्यवस्थापन हुन नसक्ने उल्लेख गर्दै यसका लागि विश्व जगतमा घटेका घटना परिघटनाबाट सबैले पाठ सिक्नु जरूरी छ भन्नुभयो ।

अन्तर्राष्ट्रिय सम्मेलनमा आफ्नो मन्तव्य राख्दै त्रिभुवन विश्वविद्यालय ईञ्जिनियरिङ्ग अध्ययन संस्थानका पूर्व डीन प्रा.डा. भरतराज पहारीले विपत भौतिक रूपमा मात्रै नभई सांस्कृतिक रूपमा समेत रहेको उल्लेख गर्नुभयो । उहाँले हालै पोखरा विश्वविद्यालयका उपकुलपतिमाथि गरिएको दुव्र्यवहार संस्कृतिमाथिको गम्भिर विपत्ति हो भन्दै हामीले कस्तो संस्कृतिको निर्माण गरिरहेका छौं भन्नेमा बौद्धिक जगतले बुझनुपर्नेमा जोड दिनुभयो ।
पोखरा विश्वविद्यालयका विज्ञान तथा प्रविधि संकायका डीन बुद्धिराज जोशीले सम्मेलन प्राज्ञिक व्यक्तित्वहरूलाई प्राकृतिक र मानव निर्मित विपत्तिहरूको बढ्दो जोखिमलाई नियन्त्रण गर्ने तरिका आदान प्रदान गर्नेतर्फ अभिप्रेरित हुने विश्वास व्यक्त गर्नुभयो । अन्तर्राष्टिय सम्मेलनका संयोजक एवम स्कूल अफ ईञ्जिनियरिङ्ग पोविका प्रा.डा. बिनयकुमार मिश्रले कार्यक्रमको उपादेयता र महत्वका बारेमा प्रकाश पार्नुभएको थियो । कार्यक्रममा यूनिभर्सिटी अफ ओभिइडियो, स्पेनका प्रा.डा. पेड्रो इग्नासियो अरकोश गोन्जालेश तथा यूएनका लागि स्वतन्त्र विपत न्यूनिकरण सल्लाहकार, ग्यारि डे ला पोमेराई, यूकेले मानव तथा प्राकृतिक विपत व्यवस्थापनका तौर तरिकाका बारेमा प्रकाश पारेका थिए ।

सम्मेलनमा नेपाल लगायत स्पेन, साइप्रस, बेलायत, पोर्चुगल, उज्बेकिस्तान आदिका गरी लगभग ३०० जना प्राध्यापक, अनुसन्धानकर्ता लगायत आदिको उपस्थिति रहेको थियो । कार्यक्रमको सञ्चालन स्कूल अफ हेल्थ एण्ड एलाईड साइन्सेज, पोखरा विश्वविद्यालयका उपप्राध्यापक चिरञ्जीवी अधिकारीले गर्नुभएको थियो । हिजोबाट शुरू भएको कार्यक्रम भोलि २०७६ वैशाख २० गते शुक्रबार सम्पन्न हुनेछ ।