पोखरा विश्वविद्यालय र एनएमबि बैंकबीच सम्झौता

२०७९ साल पौष १८ गते सोमबार, पोखरा–३०, कास्की ।
पोखरा विश्वविद्यालय र एनएमबि बैंक लिमिटेडबीच विश्वविद्यालयको आन्तरिक एवम् बाह्य विविध भुक्तानीहरूलाई बिद्युतीय अर्थात अनलाइन विधिबाट भुक्तानी गर्न सहज तुल्याउने मूल उद्देश्यलाई लिएर एक समझदारीपत्रमा हस्ताक्षर भएको छ । उक्त समझदारीपत्र (एमओयू) मा पोखरा विश्वविद्यालयका तर्फबाट रजिष्ट्रार प्रा.डा. दिपकबहादुर भण्डारी र एनएमबि बैंकको तर्फबाट उक्त बैंकका प्रमुख कार्यकारी अधिकृत सुनिल के.सि. ले हस्ताक्षर गर्नुभयो ।

एमओयू हस्ताक्षर समारोहमा पोखरा विश्वविद्यालयका उपकुलपति प्रा.डा. प्रेमनारायण अर्याल, विश्वविद्यालयका विभिन्न पदाधिकारीहरू तथा एनएमबि बैंक लिमिटेडका विभिन्न पदाधिकारीहरू उपस्थित हुनुहुन्थ्यो ।

उक्त समझदारी पछि बैंकले पोखरा विश्वविद्यालयका विभिन्न निकाय र त्यसमा आबद्ध पदाधिकारी, शिक्षक, कर्मचारी लगायत विश्वविद्यालयका विद्यार्थी एवम् कलेजहरूबाट रकम सङ्कलन वा भुक्तानी गर्नेछ भने पोखरा विश्वविद्यालयका विभिन्न निकाय र त्यसमा आबद्ध पदाधिकारी, शिक्षक, कर्मचारी लगायत विश्वविद्यालयका विद्यार्थी एवम् कलेजहरूले विश्वविद्यालयको वेबसाइट, मोबाइल बैंकिङ्ग एप्लिकेशन, कर्पोरेट नेट बैकिङ एप्लिेकेशन, कर्पोरेट नेट बैकिङ वा एनएमबि बैंकको स्वामित्वमा रहेका अन्य सम्बन्धित एप्लिकेशनहरू मार्फत पोखरा विश्वविद्यालयमा भुक्तानी गर्न सक्षम हुनेछन् । पोखरा विश्वविद्यालयले कोष व्यवस्थापनको प्रयोजनका लागि एनएमबि बैंकमा खाता राख्नुपर्नेछ ।

सम्झौता कार्यान्वयन पश्चात अनलाइन बिल भुक्तानी, तलब पोस्टिङ र बिक्रेता भुक्तानी स्वीकार गर्न, पोखरा विश्वविद्यालयको सरोकारले वेबसाइट वा एप्लिेकेशन, मोबाइल बैंकिङ, कर्पोरेट भुक्तानी, पोखरा विश्वविद्यालयद्वारा मान्यताप्राप्त कर्पोरेट नेट बैंकिङ प्रयोग गर्नुपर्नेछ । पोखरा विश्वविद्यालयले एनएमबी बैंकद्वारा समर्थित विभिन्न नेटवर्कहरूमा एकीकृत गर्न एपिआई विवरणहरू खुलाउन वा एकिकृत गर्न बैंकलाई अधिकार प्रदान गर्नेछ । बैंकले डिजिटल भुक्तानी स्वीकार गर्न सहज बनाउने उद्देश्यले बैंकलाई लाग्ने नियमित शुल्क र शुल्क बाहेक अन्य कुनै शुल्क लिने छैन ।

एमओयू समारोहलाई पोखरा विश्वविद्यालयका उपकुलपति प्रा.डा. प्रेमनारायण अर्याल, रजिष्ट्रार प्रा. डा. दिपक बहादुर भण्डारी, एनएमबी बैंकका प्रमुख कार्यकारी अधिकृत सुनिल के.सी., बैंकका उपप्रमुख कार्यकारी अधिकृत सुदेश उपाध्याय, बैंकका गण्डकी प्रदेश प्रमुख दुर्गाराम पुरी एवम् बैंकका खुद्रा बैंकिङ प्रमुख रोशन रेग्मीले सम्बोधन गर्नुभएको थियो । एनएमबि बैंकले हाल देशभरी २०१ शाखा, १३८ एटिएमहरू, ९ एक्सटेन्सन काउण्टरहरू मार्फत सेवा प्रदान गर्दै आएको छ ।

कार्यक्रमका अन्य तस्विरहरूः

स्वास्थ्य अनुसन्धान पद्धतिसम्बन्धी तालिम कार्यशाला

२०७९ साल पौष २१ गते बिहीबार, पोखरा–३०, कास्की ।
पोखरा विश्वविद्यालय स्वास्थ्य विज्ञान सङ्कायको आयोजना र नेपाल स्वास्थ्य अनुसन्धान परिषद्को सहयोगमा ३ दिने स्वास्थ्य अनुसन्धान पद्धतिसम्बन्धी तालिम कार्यशाला पोखरामा शुरू भयो । उक्त तालिम कार्यशालाको उद्देश्य स्वास्थ्य प्रणाली अनुसन्धान प्रस्ताव विकासमा स्वास्थ्यकर्मीहरूको ज्ञान तथा सिप वृद्धि गरी उनीहरूलाई स्वास्थ्य अनुसन्धान प्रक्रियाहरूको बारेमा परिचित गराउनु रहेको छ ।

उक्त तालिम कार्यशालालाई प्रमुख अतिथि एवम् पोखरा विश्वविद्यालयका उपकुलपति प्रा.डा. प्रेमनारायण अर्यालले पानसमा दियो बाली उद्घाटन गर्नुभयो । तालिम कार्यशालालाई सम्बोधन गर्दै उपकुलपति अर्यालले अनुसन्धानमा आधारित शिक्षा नभएकै कारण शिक्षाको गुणस्तर खस्केको बताउनुभयो । उहाँले अनुसन्धानले नयाँ सोच, ज्ञान र परिवर्तनको विकास गर्ने उल्लेख गर्दै लेखेर घोकेर, अनुकरण गरेर हासिल हुने शिक्षाले समाज परिवर्तन गर्न नसक्ने बताउनुभयो । उपकुलपतिले प्राज्ञिक उन्नयन र व्यक्तित्व विकासका लागि विश्वविद्यालय शिक्षा रचनात्मक र अनुसन्धानमुखी हुनुपर्नेमा जोड दिनुभयो ।

कार्यक्रममा पोखरा विश्वविद्यालयका रजिष्ट्रार प्रा.डा. दिपकबहादुर भण्डारीले शिक्षक राष्ट्रको प्रबुद्ध वर्गमा पर्ने उल्लेख गर्दै पढने पढाउने मात्र होइन शिक्षकले सभ्य र अनुशासित जनशक्ति उत्पादनतर्फ समेत ध्यान दिनुपर्ने बताउनुभयो । उहाँले अनुसन्धानमा विश्वसनीयता र नविनता हुनुपर्ने उल्लेख गर्दै अनुसन्धान प्रस्तावहरू डिग्री हासिल गर्नेतर्फमात्र केन्द्रीत नभई कोष निर्माण र जनस्वास्थ्य परियोजना भित्राउनेतर्फ पनि केन्द्रीत हुनुपर्नेमा जोड दिनुभयो ।

पोखरा विश्वविद्यालय मानविकी तथा सामाजिक शास्त्र सङ्कायका डीन सह–प्रा. डा. अजय थापाले अनुसन्धान मानव शरीर र जीवित प्राणीस“ग मात्र नभई सबै क्षेत्रमा नियमित हुनुपर्नेमा जोड दिनुभयो । तालिम कार्यशालाका सभापति एवम् पोखरा विश्वविद्यालय स्वास्थ्य विज्ञान सङ्कायका डीन सह–प्रा.डा. अमर नागिलाले स्वास्थ्यमा गरिने अनुसन्धान समाजको लागि उच्च मूल्यको रहने बताउँदै यस्ता तालिमले स्वास्थ्यकर्मीको क्षमता अभिवृद्धि गर्न सहयोग पुग्ने बताउनुभयो ।

नेपाल स्वास्थ्य अनुसन्धान परिषद्का कार्यकारी प्रमुख डा. प्रदिप ज्ञवालीले अनुसन्धानबिना शैक्षिक गुणस्तर, गुणस्तरीय प्रकाशन, शोध प्रबन्ध, क्षमता अभिवृद्धि जस्ता शैक्षिक क्रियाकलाप अगाडि बढ्न नसक्ने उल्लेख गर्दै त्यसका लागि अनुसन्धानमा लाग्नेलाई प्रोत्साहन गर्नुपर्नेमा जोड दिनुभयो । उहाँले नेपाल स्वास्थ्य अनुसन्धान परिषद्ले स्वास्थ्यकर्मीको योग्यता र सेवालाई गुणस्तरीय र बैज्ञानिक बनाउन विभिन्न संघसंस्थासँग समन्वय गरी अगाडि बढिरहेको उल्लेख गर्नुभयो ।

पोखरा विश्वविद्यालय स्कूल अफ हेल्थ एण्ड एलाइड साइन्सेजका स्कूल निर्देशक उप–प्रा. बिमला भट्टले स्वास्थ्य सेवा व्यवस्थापनमा अनुसन्धानको ठूलो महत्व रहेको उल्लेख गर्नुभयो । पोखरा विश्वविद्यालय अनुसन्धान केन्द्रका कार्यकारी निर्देशक सह–प्रा. डा. नमराज धामीले नेपाल स्वास्थ्य अनुसन्धान परिषद् राष्ट्रकै गौरव र जिम्मेवार निकाय रहेको उल्लेख गर्नुभयो । उहाँले लेख, शोध प्रबन्ध एवम् अनुसन्धानसम्बन्धी गतिविधिले शिक्षकको काम गर्ने शैली र ज्ञान आर्जनमा उल्लेख्य सुधार आउने बताउनुभयो । कार्यक्रमको सञ्चालन स्कूल अफ हेल्थ एण्ड एलाइड साइन्सेजका उप–प्राध्यापक पुजा भण्डारीले गर्नुभएको थियो । तालिम कार्यशाला आज पौष २१ गतेदेखि २३ गतेसम्म सञ्चालन हुनेछ । तालिम कार्यशालालाई डा. प्रदिप ज्ञवाली, डा. मेघनाथ धिमाल, डा. बिष्णु मरासिनी, श्री बिहुँगम बिष्ट, डा. बुना भण्डारी, श्रीमती उषा पराजुली र श्रीमति नमिता घिमिरेले प्रशिक्षण दिनु हुने कार्यक्रम छ । 

अख्तियार दुरूपयोग अनुसन्धान आयोगद्वारा अन्तरक्रिया कार्यक्रम आयोजना

२०७९ साल मंसिर २३ गते शुक्रबार, पोखरा–३०, कास्की ।
अख्तियार दुरूपयोग अनुसन्धान आयोग (अदुअआ) को कार्यालय पोखराले विश्वविद्यालय लगायत अन्य शैक्षिक संस्थाका उच्चपदस्थ पदाधिकारीहरूलाई राखेर भष्ट्राचार बिरूद्धको अन्तरक्रियात्मक कार्यक्रमको आयोजना गर्यो । भष्ट्रचार विरूद्धको अन्तर्राष्टिय दिवस डिसेम्बर ९, २०२२ को अवसरमा अख्तियार दुरूपयोग अनुसन्धान आयोग र सु–शासनका लागि नागरिक समाज (सुनास), नेपालसँगको सहकार्यमा अदुअआ कार्यालय, पोखराको सभाहलमा उक्त कार्यक्रम सञ्चालन भएको हो ।

पोखरा विश्वविद्यालयका उपकुलपति प्रा.डा. प्रेमनारायण अर्यालको प्रमुख आतिथ्यमा सञ्चालन भएको उक्त कार्यक्रममा पोखरा विश्वविद्यालय, गण्डकी विश्वविद्यालय लगायत पोखराका सामूदायिक कलेजहरूका पदाधिकारीहरू, नागरिक समाज, शिक्षा, संस्कृति, विज्ञान प्रविधि तथा सामाजिक विकास मन्त्रालय, गण्डकी प्रदेशका पदाधिकारीहरू, अदुअआ र सुनासका पदाधिकारीहरू, पत्राकारहरू आदिको उपस्थिति रहेको थियो ।

केन्द्रीय कार्यालय विस्तार लगायतको कार्यका लागि सम्झौता सम्पन्न

२०७९ साल मंसिर २३ गते शुक्रबार, पोखरा, कास्की ।
पोखरा विश्वविद्यालयको वृहत गुरूयोजना अन्तर्गत निर्माण हुन लागेको केन्द्रीय प्रशासनिक भवन विस्तार, विश्वविद्यालय परिसरमा कम्पाउण्डवाल तथा प्रवेशद्वार निर्माण एवम् जग्गा विकासका लागि सम्झौता सम्पन्न भएको छ । विश्वविद्यालयका उपकुलपति प्रा.डा. प्रेमनारायण अर्यालको समुपस्थितिमा सम्पन्न उक्त सम्झौता पत्रमा विश्वविद्यालयको तर्फबाट रजिष्ट्रार प्रा.डा. दिपक बहादुर भण्डारी र ठेकेदारको तर्फबाट अधिकृत प्रतिनिधि सुरेश गौतमले हस्ताक्षर गर्नुभयो ।

पोखरा महानगरपालिका वडा नं. ३०, कास्कीमा अवस्थित विश्वविद्यालय परिसरभित्र अवस्थित दुईतले केन्द्रीय प्रशासनिक भवनमा दुई तला थपका साथै कम्पाण्डवाल, प्रवेशद्वार, रजत स्तम्भ, जग्गा विकास (आन्तरिक बाटो, फुटपाथ, जल निकास, बगैंचा र पार्किङ्ग स्थल आदि निर्माण) का लागि छनौट भएको एल.जि.ए. कन्स्ट्रक्सन, कोटेश्वर, काठमाडौं र पोखरा विश्वविद्यालयबीच सम्झौता सम्पन्न भएको हो ।

आउँदो यही पुस १ गतेबाट निर्माण कार्य शुरू भई १५ महिनाभित्र सम्पन्न हुने उक्त निर्माण कार्यको सम्झौता लागत ११ करोड ८४ लाख ९८ हजार ८ सय १० रूपैयाँ छ ।

सम्झौतामा उल्लेख भएबमोजिम ११४ रोपनी जग्गाको विश्वविद्यालय परिसरभित्रको “ए” ब्लकमा रहेको हालको केन्द्रीय प्रशासनिक भवनलाई परिमार्जन र लिफ्टसहित दुई तला थप गरी चार तलाको बनाउने, प्रशासनिक भवन अगाडि रजतस्तम्भ निर्माण गर्ने, केन्द्रीय प्रशासनिक भवन र परीक्षा नियन्त्रण कार्यालयको कम्पाउण्डवालमाथि एकमिटर उचाईको चेनबार लगाइनेछ । साथै उक्त कम्पाउण्डवालभित्र जोडेर चारकिल्ला वरिपरि पाँचफुटको फुटपाथ निर्माण गर्ने, मूल प्रवेशद्वार निर्माण गर्ने तथा कम्पाउण्डवाल भित्रको पार्किङ्गस्थल र बगैचालाई व्यवस्थित गरिने छ ।

त्यसै गरी विश्वविद्यालय परिसरभित्रको “बि” ब्लकमा रहेको खेलमैदानलाई व्यवस्थित गर्न चेनबार भएको कम्पाउण्डवालसहित प्रवेशद्वार निर्माण गर्ने र “सि” ब्लकमा रहेको प्राज्ञिक भवन कम्प्लेक्सको उत्तरतर्फ सहायक प्रवेशद्वार निर्माण गरिनेछ । “डी” ब्लकमा विश्वविद्यालयको शिक्षण अस्पताल निर्माणको कार्य अन्तिम चरणमा रहेको र त्यही ब्लकमा पोखरा विश्वविद्यालय सम्बन्धनप्राप्त कलेजहरूको संगठन “ओपेन”द्वारा अत्याधुनिक अन्तर्राष्टियस्तरको अनुसन्धान केन्द्र निर्माण भइरहेको छ ।