पोखरा विश्वविद्यालय शिक्षण अस्पतालमा दन्त सेवा सञ्चालन

२०८१ श्रावण ११ गते शुक्रबार, पोखरा–३०, कास्की ।
पोखरा विश्वविद्यालय शिक्षण अस्पतालमा अत्याधुनिक स्तरीय उपकरण तथा प्रविधिसहितको दन्त उपचार सेवा सञ्चालनमा आएको छ । अस्पतालले बहिरङ्ग सेवा, स्त्री तथा प्रसुति रोग सेवा, हाडजोर्नी तथा नशा रोग सेवा, बालरोग सेवा, फिजिसियन तथा जनरल मेडिसिन सेवाका साथै इमर्जेन्सी सेवा, यू.एस.जी. र इ.सि.जी. सेवासँगै दन्त रोग उपचार सेवा सञ्चालनमा ल्याएको हो ।
दन्त विभागमा अस्थायी/स्थायी रूपमा दाँत भर्ने तथा लगाउने, दाँतको रङ्गको सिमेन्ट भर्ने, दाँत सफा गर्ने र टल्काउने, गिजासम्बन्धी सम्पूर्ण रोगको उपचार गर्ने, दाँत निकाल्ने र नयाँ दाँत प्रत्यारोपण गर्ने, दाँतको डिजिटल एक्सरे र ओपिजी गर्ने, बाङ्गोटिङ्गो दाँतलाई तार बाँधेर मिलाउने, दाँतको जरैदेखि उपचार गर्ने, दाँत र मुखको माइनर सर्जरी गर्ने, एउटा पनि दाँत नभएको ठाउँमा दाँत लगाउने आदि सेवा उपलब्ध छन् ।

दन्त विभागमा मोटर जडित सक्सन, माइक्रो मोटर, एअर मोटर, अल्ट्रा सोनिक इस्क्यालर, सेन्सर प्यानलसहितका ८ वटा स्तरीय डेन्टल चेयर रहेको र डेन्टल चेयरमा नन्–टच सेन्सर लाइट जडित छन् । दन्त विभागलाई डेन्टल कम्प्रेसर, सिइपिएचसहितको ओपिजी मेशिन, आरभिजी सेन्सरको साथ डेन्टल एक्सरे मेशिन, क्लास बी अटोक्लेभ मेशिन, इनबिल्ट एपेक्स लोकेटरको साथइन्डोमोटर, वाटर डिस्टिलर मेशिन, स्केलिङ मेशिन, अल्ट्रासोनिक क्लिनर, यूभि चेम्बर आदिले पूर्ण बनाइएको छ ।

दन्त विभागलाई दक्ष तथा अनुभवी एकजना बिडिएस डेन्टल सर्जन र एक जना पिसिएल डेन्टल हाइजीनिष्टको नेतृत्वमा सञ्चालन गरिएको पोखरा विश्वविद्यालय शिक्षण अस्पतालका निर्देशक सह–प्रा.डा. दिपेन्द्रकुमार यादवले जानकारी दिनुभयो । शिक्षण अस्पताल सरकारी भएकोले दन्त सेवा शुल्क र उपचार खर्च अन्य सरकारी अस्पताल सरह भएको उहाँको भनाई थियो ।

दन्त चिकित्सक डा. मानुषी पौडेलले पोखरा विश्वविद्यालय शिक्षण अस्पतालअन्तर्गत डेन्टल ओपिडि सेवा बिदाको दिन बाहेक १० बजेदेखि ५ बजेसम्म सञ्चालन हुने र यहाँ दाँतका बिरामीहरुलाई सुविधासम्पन्न ल्याबदेखि फार्मेसीसम्मका सम्पूर्ण सेवाहरू उपलब्ध रहेको जानकारी दिनुभयो । उहाँले अत्याधुनिक प्रविधिमा दाँतको डिजिटल एक्सरेसँगै पोखरामा कमै ठाउँमा रहेको मुखैभरिको टाउँको भरिको एक्सरे एउटै फिल्ममा देखाउन सकिने ओपीजी प्रविधि समेत रहेको बताउनुभयो ।

डा. मानुषीले वरिपरिको सरकारी अस्पताल गण्डकी अस्पताल, धरान लगायत सबै शिक्षण अस्पतालहरूको उपचार खर्चको आधारमा न्यूनतम सस्तो दररेटमा उपचार खर्च तय गरिएको उल्लेख गर्दै वरिपरिको जनसमुदायलाई यहाँ आएर उपचार गर्दा निकै फाइदा हुने देखेको उहाँको भनाई थियो । उहाँले स्थानीयलाई बाहिर गएर राम्रो विशेषज्ञ डाक्टरसँग दन्त उपचार गर्दा आठसय नौसय शुल्क तिर्नुपर्ने, उपचारका लागि लाइनमा बसी धेरै समय कुर्नुपर्ने तर यहाँ एकसय रूपैयाँको टिकटमा जतिबेला पनि विशेषज्ञ डाक्टरहरू उपलब्ध हुने भएकोले यही नजिकै यस्तो सेवा भएकोले सस्तोमा फाइदा लिन सबै स्थानीयलाई आग्रह गर्नुभयो ।

पोखरा विश्वविद्यालय शिक्षण अस्पतालका बायोमेडिकल ई. सुसन्जित विजय कोइरालाले दाँतको उपचारका लागि नब्बे प्रतिशत उपकरणहरू सेटअप गरिसकिएको जानकारी दिनुभयो । हातको सेन्सरबाट चल्ने र मोटोराइज्ड सक्सन भएका तथा दाँत काट्ने, दाँत सफा गर्ने औजारसहितका सुविधायुक्त आरामदायी डेन्टल चेयर रहेको उहाँको भनाई थियो । उहाँले सिइपिएचसहितको ओपिजी मेशिनबाट दाँत तथा गर्दनको एक्सरे लिन सकिने प्रविधिबाट धेरै लाभान्वित हुनसक्ने बताउनुभयो ।

४१ करोड ४३ लाखमा नयाँ शैक्षिक भवन निर्माणका लागि सम्झौता

२०८१ साउन ३ गते बिहीबार, पोखरा–३०, कास्की ।
पोखरा विश्वविद्यालयले नयाँ शैक्षिक भवन निर्माणका लागि सम्झौता गरेको छ । पोखरा विश्वविद्यालयका उपकुलपति प्रा.डा. प्रेमनारायण अर्यालको समुपस्थितिमा सम्पन्न उक्त सम्झौता पत्रमा विश्वविद्यालयको तर्फबाट रजिष्ट्रार प्रा.डा. दिपकबहादुर भण्डारी र निर्माण व्यवसायीको तर्फबाट प्रमुख कार्यकारी अधिकृत सन्तोष श्रेष्ठ एवम् सुपरभिजन परामर्शदाताको तर्फबाट प्रबन्ध निर्देशक ई. विष्णु प्रसाद खनालले हस्ताक्षर गर्नुभयो ।

पोखरा–३०, खुदी, ढुङ्गेपाटन, कास्कीमा अवस्थित विश्वविद्यालय प्राज्ञिक भवन कम्प्लेक्सको हाताभित्र निर्माण गरिने नयाँ शैक्षिक भवनका अतिरिक्त स्कूल अफ हेल्थ एण्ड एलाइड साइन्सेज भवनका लागि ट्रस संरचना, स्कूल अफ बिजनेश भवनका लागि शौचालय निर्माण र पुरानो प्रशासनिक भवनको मर्मतसहितका सम्बद्ध कार्यहरूका लागि १७ वटा बोलपत्रमध्येबाट यस आजोनाका लागि छनौट भएको निर्माण व्यवसायी श्रेष्ठ एण्ड सन्स, चो रोल्पा जेभी, काठमाडौं र पोखरा विश्वविद्यालयबीच सम्झौता सम्पन्न भएको हो । आयोजनाको सुपरभिजन परामर्शदाताको रूपमा रहेको पेस कन्सल्टेन्ट, काठमाडौंले गर्नेछ ।

यही श्रावण १५, २०८१ बाट निर्माण कार्य शुरू भई ३० (तीस) महिनाभित्र सम्पन्न हुने उक्त निर्माण कार्यको सम्झौता लागत रकम ४१,४३,१७,५५९।७७ (एकचालीस करोड त्रिचालीस लाख सत्रहजार पाँचसय उनन्साठी र पैसा सतहत्तर) रहेको छ ।

प्राज्ञिक भवन कम्प्लेक्सभित्र रहेको स्कूल अफ इन्जिनियरिङको पश्चिमपट्टि र स्कूल अफ डेभलपमेन्ट एण्ड सोसल इन्जिनियरिङको दक्षिणपट्टि बाँस्केटबल कोर्ट भएको स्थानलाई समेत प्रयोग गरी निर्माण गरिने नयाँ शैक्षिक भवन अत्याधुनिक र सुविधा सम्पन्न हुनेछ । भुइतलादेखि सातवटा तला भएको उक्त भवनमा ४८ जना विद्यार्थी क्षमताका १४ वटा कोठा र ३० विद्यार्थी क्षमताका १२ वटा कोठा गरी २६ वटा कक्षा कोठाहरू हुनेछन् । भवनमा १२ वटा प्रशासनिक कोठाहरू, २४ वटा शिक्षक बस्ने कोठाहरू, ४ वटा विभागी प्रमुखका कोठाहरू रहनेछन् ।

यसरी कुल ६६ वटा कोठाहरू डिजाइन गरिएको उक्त भवनमा छात्रा/महिलाका २३ वटा बाथरूम/ट्वाइलेट, छात्र/पुरूषका लागि १८ वटा बाथरूम/ट्वाइलेट, २४ वटा यूरिनल्स् र प्रत्येक तलामा स्टाफहरूका लागि एकएक वटा बाथरूम/ट्वाइलेटहरू निर्माण गरिनेछ । यसका साथै भवनमा एक एकवटा प्राथमिक उपचार कक्ष, चौकीदार कक्ष, प्यान्ट्री कक्ष, बिजुली कोठा र ४ वटा भण्डारकोठाहरू रहनेछन् । त्यस्तै भवनलाई दुईवटा भर्याङ् र एउटा लिफ्टसहित ३०० जना क्षमताको एउटा अडिटोरियम हल र ४० जना क्षमताको एउटा मिनि हलले सुविधायुक्त तुल्याइनेछ । भवनको भुइतलामा १९ वटा कार, ५० वटा मोटरसाइकल तथा भवन परिसरमा ७० वटा मोटरसाइकल अट्नसक्ने गरी व्यवस्थित गरिनेछ । सम्झौताबमोजिम भवनलाई निर्माण व्यवसायीले भवनका लागि आवश्यक पर्दा, कार्पेट एवम् फर्निचरले राम्रोसँग सुसज्जित गरी विश्वविद्यालयलाई हस्तान्तरण गर्नुपर्नेछ ।

विश्वविद्यालयमा नयाँ नयाँ कार्यक्रमरू थपिने क्रममा रहेका र पठन–पाठनका लागि यथेष्ट कक्षा कोठाहरू आवश्यक हुँदै गएको सन्दर्भमा विश्वविद्यालयले विश्वविद्यालय अनुदान आयोग, विभिन्न दातृ निकायहरूको अनुदान सहयोग एवम् आफ्नै आन्तरिक श्रोत परिचालन गरी नयाँ अत्याधुनिक शैक्षिक भवन निर्माण गर्न लागेको हो । विश्वविद्यालयमा निर्माण हुन लागेको यो भवनले विश्वविद्यालयको शैक्षिक पूर्वाधारमा ठूलो फट्को मार्ने र पोखरा–२६ विजयपुरमा मासिक लाखौं खर्च गरी भाडामा सञ्चालन हुँदै आएको स्कूल अफ इन्जिनियरिङको ब्लक “बी” र पोखरा–३०, गगनगौंडामा मासिक हजारौं खर्च गरी सञ्चालित फिजियोथेरापी कार्यक्रमलाई नयाँ शैक्षिक भवनमा स्थानान्तरण गर्ने विश्वविद्यालयको लक्ष्य रहेको छ ।

पोखरा विश्वविद्यालय स्थापनाको २८ वर्षमा प्रवेश

२०८१ श्रावण १ गते मङ्गलबार, पोखरा–३०, कास्की ।

पोखरा विश्वविद्यालय आजबाट २८ वर्षमा प्रवेश गरेको छ । पोखरा विश्वविद्यालय ऐन, २०५३ अनुसार यो वि.सं. २०५४ साल श्रावण १ गते स्थापना भएको हो । विश्वविद्यालय स्थापनाको २८ औं वर्षगाँठको अवसर पारेर विश्वविद्यालयले आज विश्वविद्यालयको केन्द्रीय कार्यालयमा एक कार्यक्रमको आयोजना गर्यो । कार्यक्रमलाई विश्वविद्यालय उपकुलपति प्रा.डा. प्रेमनारायण अर्यालले उद्घाटन गर्नुभयो ।

कार्यक्रममा पोखरा विश्वविद्यालयमा २५ वर्ष अटुट सेवा गरेका शिक्षक तथा कर्मचारीलाई दीर्घ सेवा पदकसहित सम्मान पनि गरिएको छ । विश्वविद्यालयका उपकुलपति प्रा.डा. प्रेमनारायण अर्याल, रजिष्टार प्रा.डा. दिपकबहादुर भण्डारी लगायतका पदाधिकारीहरूले दीर्घ सेवा पदक पाउने शिक्षक तथा कर्मचारीहरूलाई सुनचाँदीलाई टकमरी बनाइएको दीर्घ सेवा पदक, सम्मानपत्र र दोसल्लाले सम्मानित गर्नुभयो । सम्मानित हुनुहुनेमा प्राध्यापक हरिबहादुर खड्का, सह–प्रशासकहरू– यादव थापा, गोबर्धन भट्टराई, हेमन्तराज कण्डेल, टोलमाया थापा तथा उप–प्रशासकहरू सीता देवी ढकाल, लोकप्रसाद ढकाल, शंकर पौडेल, सहायक प्रशासक बाबुराम अर्याल, मुख्य सहायक बिमल कार्कि, सवारी चालकहरू विष्णुराज गिरी र सुरेन्द्रमान बज्राचार्य एवम् कार्यालय सहयोगीहरू चन्द्र सुवा गुरूङ, चन्द्रकुमारी चेम्जोङ, जीवनाथ फुयल र सन्तोषि गिरी हुनुहुन्छ । सम्मान समारोहमा गोबर्धन भट्टराई, सीतादेवी ढकाल र बिमल कार्कि अनुपस्थित हुनुहुन्थ्यो ।

विश्वविद्यालयको २८ औ स्थापना दिवसलाई सम्बोधन गर्दै विश्वविद्यालयका उपकुलपति प्रा.डा. प्रेमनारायण अर्यालले पोखरा विश्वविद्यालय जसले जन्मायो उसले धेरै पिडाका साथ जन्माएको उल्लेख गर्दै यसको विकासका लागि सबै सत्पात्र भएर लाग्नुपर्नेमा जोड दिनुभयो । उहाँले विश्वविद्यालय एउटाको सोच र चिन्तनले मात्र अगाडि नबढ्ने भन्दै यसको सुधारको लागि सबैको सामूहिक दायित्व र कर्तव्य हुनु आवश्यक रहेको उल्लेख गर्नुभयो । उपकुलपतिले विश्वविद्यालयले समाजको सेवा गर्नुपर्छ भन्दै शिक्षण अस्पताल पनि सञ्चालनमा ल्याएको बताउनुभयो । उहाँले सबैसँग छलफल सल्लाहबाट दीर्घकालीन योजनाहरूको परिकल्पना गरी काम कारवाही अगाडि बढाएको उल्लेख गर्नुभयो ।

कार्यक्रममा पोखरा विश्वविद्यालयका रजिष्ट्रार प्रा.डा. दिपकबहादुर भण्डारीले पैसाको अभावमा पोखरा विश्वविद्यालयको विकास नरोकिएको उल्लेख गर्दै यहाँ काम गर्ने केहीको नकारात्मक सोच र शैलीले विश्वविद्यालयले अपेक्षित गति लिन नसकेको टिप्पणी गर्नुभयो । सहि नियत र जिम्मेवारीमा दृढ भई काम गर्नेलाई विश्वविद्यालयले उचित मूल्याङ्कन गर्ने उल्लेख गर्दै राम्रो काम गर्नेको पछाडि अख्तियार नलाग्ने र उसको पदोन्नति पनि नरोकिने बताउनुभयो । रजिष्टार भण्डारीले विश्वविद्यालय एउटा सिस्टममा चल्ने बताउँदै विद्यार्थीलाई आकर्षित गर्न शिक्षकहरू राम्रो र दक्ष हुनुपर्ने उहाँको भनाई थियो । उहाँले हामी अन्य विश्वविद्यालय जस्तो नभएकोले हामी आफै कमाएर खानुपर्ने भएकोले स्कूललाई नाफामा लग्न सकेमात्र हामीले लिने सेवा र सुविधालाई पनि बढाउन सकिने उल्लेख गर्नुभयो ।

कार्यक्रममा बोल्दै मानविकी तथा सामाजिक शास्त्र सङ्कायका डीन सह–प्रा.डा. अजय थापाले विश्वविद्यालयले विगत ५ वर्षदेखि अन्य विश्वविद्यालयसरह विद्यार्थी पलायन जस्तो विशिष्ट खालको चुनौतिको सामना गर्नुपरेको उल्लेख गर्नुभयो । उहाँले यसको सुधारका लागि विश्वविद्यालयले नयाँ कार्यक्रम थप र श्रमबजार अनुसार पाठ्यक्रम तर्जुमा गर्नुपर्नेमा जोड दिनुभयो । उहाँले विश्वविालयले उत्पादन गरेका साठी हजार भन्दा बढी दक्ष जनशक्ति स्वदेश, विदेशका बजारमा रहेको उल्लेख गर्दै यो निकै गौरव गर्न लायक विषय भएको उल्लेख गर्नुभयो । उहाँले २५ वर्षको अवधिमा शुन्यबाट आजको अवस्थामा विश्वविद्यालय आएपनि यसलाई अझै चिलजस्तो उचाईमा उडान भर्ने सोच र विश्वाससहित अगाडि बढाउनुपर्नेमा जोड दिनुभयो ।

पोखरा विश्वविद्यालय विज्ञान तथा प्रविधि सङ्कायका डीन प्रा. राजेश कुमार ठगुराठीले विश्वविद्यालयलाई सबैले आफ्नो घर सम्झेर अनुशासनमा रही जिम्मेवारी बहन गर्नुपर्ने बताउनु भयो । उहाँले विश्वविद्यालयमा कार्यरत सबै पदाधिकारी, शिक्षक, कर्मचारीको हैसियत सहयोगी भएको उल्लेख गर्दै सेवाग्राहीलाई कसरी छिटो छरितो रूपमा सेवा दिन सकिन्छ भन्ने भावले सबैले काम गर्नुपर्नेमा जोड दिनुभयो । उहाँले नराम्रो कामका लागि उर्जा खेर फाल्नुभन्दा सकारात्मक सोचका साथ सकारात्मक काममा उर्जा बढाउन सके विश्वविद्यालयमा सबैको भविष्य उज्ज्वल रहेको बताउनुभयो ।

कार्यक्रममा पोखरा विश्वविद्यालय स्वास्थ्य विज्ञान सङ्कायका डीन सह–प्रा.डा. अमर नागिलाले पोखरा विश्वविद्यालयमा जस्तो सुकै आस्था र विचारमा रहेपनि नियमावलीमा बसेर काम, कर्तव्य र अधिकारमा बसेर काम गर्नेलाई इतिहासले मूल्याङ्कन गर्ने बताउनुभयो । उहाँले उच्च शिक्षालाई संसारभर शीरको ताज बनाएर राखिन्छ भन्दै विश्वविद्यालयको केन्द्र भनेको विद्यार्थी रहेको उल्लेख गर्नुभयो । उहाँले विद्यार्थीको हितमा काम गरे तपाई हाम्रो जागिर रहन्छ, नगरे जागिर रहँदैन भन्नुभयो । उहाँले विश्वविद्यालयमा मेडिकल स्कूलको स्थापना गरेर अनुसन्धान कार्य अगाडि बढाउन सके विश्वविद्यालयलाई थोरै भएपनि भारथेक गर्न सकिने बताउनुभयो ।

पोखरा विश्वविद्यालय व्यवस्थापन सङ्कायका डीन सह–प्रा.डा. दयाराज ढकालले आफ्नो दुई आमा, एउटा जन्मदिने आमा र अर्को आफ्नो क्षमता, गुणस्तर देखाउने पोखरा विश्वविद्यालय आमा रहेको उल्लेख गर्नुभयो । उहाँले यी दुई आमाको अवस्था पहिला निकै दयनीय रहेको र अहिले एउटी आमा न्यूयोर्कमा ऐस आरामका साथ रहेकी र अर्की आमाले भौतिक एवम् शैक्षिक पूर्वाधारमा निकै प्रगति गरेको देख्दा आफूलाई निकै गर्व लागेको उल्लेख गर्नुभयो । उहाँले पोखरा विश्वविद्यालयप्रतिको आफ्नो प्रेम अटुट र अविच्छिन्न रहको उल्लेख गर्दै आफू यसैमा रमाएको उल्लेख गर्नुभयो ।

कार्यक्रममा बोल्दै पोखरा विश्वविद्यालय अन्तर्राष्ट्रिय सम्बन्ध केन्द्रका कार्यकारी निर्देशक सह–प्रा.डा. उमेशसिंह यादवले राष्ट्रिय गान बज्दा त्यसलाई सबैले धक र लाज नमानी गाउनुपर्ने उल्लेख गर्दै यस कार्यले राष्ट्रप्रति उसको सम्मान झल्किने बताउनुभयो । उहाँले विश्वविद्यालयमा कोहि कसैले आस्थाको राजनीति मुखुण्डो ओढेर त्यसको पक्षमा काम गर्न नहुने उल्लेख गर्दै सबैले विश्वविद्यालयको सिस्टमबमोजिम काम गर्नुपर्नेमा जोड दिनुभयो । उहाँले विश्वविद्यालय शिक्षक कर्मचारी दुबैको संयुक्त पहल र कार्यले मात्र अगाडि बढ्न सक्ने भन्दै विश्वविद्यालयको गुणस्तरलाई जीवन्त राख्न यसको सिस्टम नभाँची अग्रानिक ग्रोथमा अगाडि बढाउन सबैले पहल गर्नुपर्ने उहाँको भनाई थियो ।

पोखरा विश्वविद्यालय स्कूल अफ इन्जिनियरिङका स्कूल निर्देशक डा. ओमप्रकाश गिरीले परिवर्तन अरूबाट होइन आफूबाटै शुरू गर्नुपर्नेमा जोड दिनुभयो । उहाँले विश्वविद्यालयमा भौतिक पूर्वाधार र शैक्षिक गुणस्तरमा धेरै परिवर्तन र विकास भएको उल्लेख गर्दै अझ यसलाई सबैको सामूहिक पहलले धेरै राम्रो, हाम्रो र गर्व गर्ने विश्वविद्यालय बनाउन सक्छौं भन्नुभयो । उहाँले विश्वविद्यालयको नीतिगत तहमा स्कूललाई पनि समावेश गर्नुपर्ने उल्लेख गर्दै यसले स्कूलको समस्याहरू सम्बोधन गर्न सहज हुने बताउनुभयो ।

पोखरा विश्वविद्यालय शिक्षण अस्पतालका निर्देशक सह–प्रा.डा. दिपेन्द्रकुमार यादवले विश्वविद्यालयको वर्तमान नेतृत्वको अथक प्रयासले नयाँ नयाँ भवनहरू बनेको, विभिन्न परियोजनाहरू सञ्चालन भएको र अस्पताल सञ्चालन गर्न सकिएको उल्लेख गर्नुभयो । उहाँले वर्तमान नेतृत्व लगनशिल भएर विश्वविद्यालयको कामहरूलाई अद्यावधिक गर्ने पथमा हिडिरहेकोले यसलाई सबैको साथ र सहयोग भएमा विश्वविद्यालय अझै अगाडि बढ्न सक्ने बताउनुभयो ।

पोखरा विश्वविद्यालय कार्यकारी परिषद्का सदस्य योगराज लामिछानेले विश्वविद्यालयका नियुक्तिहरू राजनीतिक भागबण्डाका आधारमा हुन नहुने उल्लेख गर्दै यसलाई मापदण्डको आधारमा कार्यविधि बनाएर गर्नुपर्नेमा जोडदिनुभयो । उहाँले विश्वविद्यालयका प्राध्यापकमा भिजन भएकोले पदाधिकारी हुनका लागि प्रतिवेदन बनाएर बस्न आग्रह गर्नुभयो । उहाँले प्राध्यापकहरूको राजनीतिक सम्बन्ध राम्रो भएकोले उक्त सम्बन्धलाई नियुक्तिमा नभई विश्वविद्यालयको उन्नयनमा लगाउन समेत आग्रह गर्नुभयो । उहाँले उस्तै उस्तै प्रकृतिमा स्थापना भएका मध्यपश्चिम र सुदूर पश्चिम विश्वविद्यालयको सम्पूर्ण आर्थिक दायित्व सरकारले बहन गर्ने तर पोखरा विश्वविद्यालय र पूर्वाञ्चल विश्वविद्यालयलाई आफै कमाएर खा भन्ने नीति अपमानपूर्ण रहेको उहाँको भनाई थियो ।

पोखरा विश्वविद्यालय योजना तथा कार्यक्रम महाशाखा प्रमुख प्रा.डा. दीपकराज पौडेलले विश्वविद्यालयमा शिक्षकले दिएको प्रेसर छिटो लागू हुने, तर कर्मचारीको सुनेको नसुनै गर्ने प्रवृत्ति गर्न नहुनेमा जोड दिनुभयो । उहाँले नकारात्मक सोचले विश्वविद्यालय उभो नलाग्ने भन्दै आफू विश्वविद्यालयको वृत्ति विकासका लागि अगाडि बढेँ कि अड्काउन बढेँ भन्ने कुरालाई सबैले मनन गर्नुपर्ने उल्लेख गर्नुभयो ।

पोखरा विश्वविद्यालय प्राध्यापक संघका सभापति सह–प्रा.डा. निरञ्जन श्रेष्ठले पोखरा विश्वविद्यालय छ र त हामी छौं भन्दै सबैले आ–आफ्नो जिम्मेवारी कर्तव्यकासाथ निभाउनुपर्नेमा जोड दिनुभयो । उहाँले विश्वविद्यालयमा पदाधिकारी बन्न एउटा मापदण्ड बनाउनुपर्ने उल्लेख गर्दै पदका लागि राजनीति नगर्न सबैलाई आग्रह गर्नुभयो । उहाँले विश्वविद्यालयमा सबैको उचित समयमा वृत्तिविकास र पदोन्नति हुनुपर्ने उल्लेख गर्दै यसका लागि विश्वविद्यालयले वार्षिक क्यालेण्डर बनाएर सेवा आयोग खुलाउनुपर्ने बताउनुभयो ।

पोखरा विश्वविद्यालयका स्कूल अफ बिजनेशका प्राध्यापक तथा दीर्घ सेवा पदकबाट सम्मानित व्यक्तित्व प्रा.हरिबहादुर खड्काले पोखरा विश्वविद्यालय पहिला सानो आकारमा रहेको र अहिले बिशाल भएको उल्लेख गर्दै जहाँ गएपनि पोखरा विश्वविद्यालयका विद्यार्थीहरूसँग साक्षात्कार हुने भएकोले हामीलाई सम्मान मिलेको छ भन्नुभयो । उहाँले विश्वविद्यालयको प्रशासनिक र शिक्षण दुबैमा मानव संसाधन निकै राम्रो रहेको उल्लेख गर्दै मनमुटाव नराखी सबैले मिलेर राम्रो कार्य गरेमा संस्था त्यत्तिकै राम्रो हुने विचार राख्नुभयो । उहाँले आफूले विश्वविद्यालयबाट धेरै अवसर प्राप्त गरेको उल्लेख गर्दै जिम्मेवारी बोधका साथ सबैले काम गरे बेलुका घरमा समेत सन्तुष्टी मिल्ने उहाँको भनाई थियो ।

सम्मानित व्यक्तित्व विश्वविद्यालयका सह–प्रसाशक यादव थापाले विश्वविद्यालयले समकालीन सबैलाई सम्मान दिएकोमा विश्वविद्यालयप्रति आभार व्यक्त गर्नुभयो । उहाँले पोखरा विश्वविद्यालयमा अवसर पनि चुनौति पनि दुबै रहेको उल्लेख गर्दै विश्वविद्यालयलाई केन्द्रबिन्दुमा राखेर आ–आफ्नो कर्तव्यलाई मन, वचन र कर्मले निभाउन सके सबैको भविष्य सुनौलो रहेको उल्लेख गर्नुभयो । उहाँले विश्वविद्यालयले आफै कमाएर खानुपर्ने भएकोले उपलब्ध साधन र स्रोतलाई ध्यानमा राखेर कार्य गर्नुपर्ने बताउनुभयो ।

पोखरा विश्वविद्यालयका सह–प्रशासक तेजनारायण पराजुलीले २७ वर्ष अगाडि रोपेको सानो वृक्ष आज वयस्क भएको र यसबाट प्राप्त फलफूल समाजले पाएर लाभान्वित भएको उल्लेख गर्नुभयो । उहाँले पोखरा विश्वविद्यालयमा कुचो लगाउनेदेखि इट्टा थप्ने सबैको उत्तिकै योगदान रहेको भन्दै विश्वविद्यालयमा काम गर्नेलाई सबै ठाउँबाट सम्मानको दृष्टिकोणले हर्ने गरेको बताउनुभयो । विश्वविद्यालयले उत्पादन गरेका जनशक्ति देशभित्रका सरकारी कार्यालय, संघसंस्थामा मात्र नभई अन्तर्राष्टियस्तरमा समेत जताततै उच्चतहमा बसी काम गरेको र म पोखरा विश्वविद्यालयमा काम गर्छु भन्ने थाहा पाएपछि त्यहाँबाट पाउने सहयोगले आफूलाई निकै आत्मसन्तुष्टि मिलेको उहाँले बताउनुभयो । उहाँले पोखरा विश्वविद्यालयमा अन्यत्रको भन्दा सेवा सुविधामा राम्रो रहेको बताउँदै यसलाई फरक ढाँचाले पढ्ने वातावरण बढाउनुपर्ने र अनुसन्धानमा केन्द्रीत गर्नुपर्नेमा जोड दिनुभयो ।

कार्यक्रममा सम्मानित व्यक्तित्व पोखरा विश्वविद्यालयका सह–प्रशासक टोलमाया थापाले विश्वविद्यालयमा २५ वर्षको अवधि गुजार्नु सानो कुरा नभएको र यो एउटा इतिहास भएको बताउनुभयो । उहाँले शुरूमा विश्वविद्यालयमा जागिर खाँदा बिदा नपाईने, थोरै सङ्ख्याका कर्मचारीलाई कामको बोझ धेरै हुँदा घर समेत जान नपाएको स्मरण गर्नुभयो । ऊ बेला मेरो स्वर्गीय आमाले छोरीलाई पढाएर गल्ती गरेछु भन्नुहुन्थ्यो, आज पदक, दोसल्ला र अबिर जात्रे अनुसार उहाँलाई देखाउँन पाएको भए पढाएर राम्रो गरेछु भन्नुहुन्थ्यो होला, त्यसैले पहिलाको जस्तो कठिन अवस्था विश्वविद्यालयमा अहिले नरहेको उहाँको भनाई थियो । आफ्नो जिम्मेवारीलाई कर्तव्यका साथ निभाउन सके विश्वविद्यालयले एक न एकदिन अवश्य मूल्याङ्कन गर्छ भन्दै विश्वविद्यालयको हितका लागि सबैले काम गर्नुपर्ने उहाँले बताउनुभयो ।

पोखरा विश्वविद्यालय कर्मचारी संघका अध्यक्ष सहायक प्रशासक चोलाकान्त च्वाईले कर्मचारी पनि विश्वविद्यालयको एउटा हिस्सा भएकोले आस्थाका भरमा विश्वविद्यालयमा शिक्षक र कर्मचारीमा विभेद गर्न नहुने तर्क राख्नुभयो । उहाँले आचारसंहिता विपरित हिडेको कर्मचारी मात्र होइन, शिक्षकलाई पनि त्यही अनुरूप कारवाही गर्नुपर्ने उल्लेख गर्दै शिक्षकलाई ५ वर्षमा बढुवा चाहिने, तर कर्मचारीलाई बढुवाका लागि १० वर्षभन्दा बढी कुर्नुपर्ने कुरा जायज नभएको उहाँको भनाई थियो ।

पोखरा विश्वविद्यालय स्थापना दिवस कार्यक्रमको सञ्चालन सह–प्रशासक तारादेवी सापकोटाले गर्नुभएको थियो ।

व्यवहारिक विज्ञान तथा इन्जिनियरिङमा अन्तर्राष्टिय सम्मेलन आयोजना

२०८१ साल जेष्ठ २८ गते मङ्गलबार, पोखरा–३०, कास्की ।
पोखरा विश्वविद्यालय विज्ञान तथा प्रविधि सङ्कायको आयोजना, विश्वविद्यालय अनुदान आयोग र स्कूल अफ इन्जिनियरिङ, पोखरा विश्वविद्यालयको सहकार्य तथा विज्ञान तथा प्रविधि सङ्कायअन्तर्गतका पोखरा विश्वविद्यालयका सम्बन्धन तथा संयुक्त आङ्गिक कलेज एवम् ४ वटा राष्ट्रिय तथा अन्तर्राष्ट्रिय संस्थाहरूको सह–आयोजनामा ३ दिने अन्तर्राष्ट्रिय सम्मेलन पोखरामा शुरू भयो । “इन्टरनेशनल कन्फरेन्स अन एप्लाइड साइन्स एण्ड इन्जिनियरिङ इन चेन्जिङ वल्ड” नाम दिइएको उक्त सम्मेलनको उद्घाटन वरिष्ठ आँखा रोग विषेषत्र सन्दुक रूइत र पोखरा विश्वविद्यालयका उपकुलपति प्रा.डा. प्रेमनारायण अर्यालले सयुक्तरूपमा पानसमा दीप प्रज्ज्वलन गरी गर्नुभयो ।

तीस लाख खर्च अनुमान गरिएको उक्त सम्मेलनमा नेपाल लगायत विश्वका १२ देशहरू भारत, पाकिस्तान, दक्षिण कोरिया, जापान, चीन, पाराग्वे, जर्मनी, अमेरिका, अष्ट्रिया र स्पेनमा अवस्थित विभिन्न शैक्षिक संस्थामा आबद्ध १२० जना सहभागिले कन्फरेन्स पेपर प्रस्तुतिकरण गर्ने कार्यक्रम छ । ३०० जना भन्दा बढी प्राध्यापक, विद्यार्थी, अनुसन्धानकर्मीहरूको सहभागिता रहेको उक्त सम्मेलनमा भूकम्प प्रविधि समाज नेपालका अध्यक्ष एवम् पोखरा विश्वविद्यालयबाट सम्बन्धनप्राप्त यूनिभर्सल इन्जिनियरिङ एण्ड साइन्स कलेजका व्यवस्थापन समितिका अध्यक्ष डा. आमोदमणि दीक्षित, कोरियन प्राध्यापक डा. कियुङ चुन किम, जापानिज प्राध्यापक डा. योशिमित्सु नाकाजिमा तथा प्राध्यापक डा. टेकराज ज्ञवाली प्रमुख वक्ता हुनुहुन्छ ।

सम्मेलनको उद्घाटन सत्रलाई शान्ति तथा अन्तर्राष्ट्रिय समझादरीका लागि रामोन म्यागसेसे पुरस्कार विजयी, नयाँ इन्ट्रा अकुलर लेन्सका प्रतिपादक तथा बहराइनको इसा पुरस्कार विजेता नेपालका ख्यातिप्राप्त वरिष्ठ आँखारोग विशेषज्ञ डा. सन्दुक रूइत, पोखरा विश्वविद्यालयका उपकुलपति प्रा.डा. प्रेमनारायण अर्याल, गण्डकी विश्वविद्यालयका उपकुलपति प्रा.डा. नवराज देवकोटा, पोखरा विश्वविद्यालयका रजिष्ट्रार प्रा.डा. दिपकबहादुर भण्डारी, पोखरा विश्वविद्यालय विज्ञान तथा प्रविधि सङ्कायका डीन प्रा. राजेशकुमार ठगुराठी, प्राध्यापक डा. बिनयकुमार मिश्रले सम्बोधन गर्नुभयो ।

सम्मेलनको मुख्य उद्देश्य अहिलेका वर्तमान अवस्थामा विश्वमा इन्जिनियरिङ क्षेत्रमा भइराखेका अनुसन्धान विशेष गरेर व्यवहारिक विज्ञानले समाजको विकासमा कस्तो असर पार्छ, कहाँ कहाँ तिनिहरूलाई लागू गर्न सकिन्छ भन्ने विषयमा पेपर प्रस्तुतिकरण हुनेछ । यस सम्मेलनले हाल विज्ञान तथा प्रविधिमा अनुसन्धान कुन कुन विधामा भइराखेको छ त्यो थाहा हुने र एकै ठाउँमा बसेर विभिन्न देशका अनुसन्धानहरूको बारेमा जानकारी लिन सहज हुनेछ । सम्मेलनमा सहभागिता जनाउने विद्यार्थी र नव अनुसन्धानकर्मीहरूलाई वरिष्ठ प्राध्यापक तथा अनुसन्धानकर्मीहरूसित भेटघाट, अन्तरक्रिया गर्ने, नेटवर्किङ गर्ने अवसर प्राप्त हुनेछ । यस्ता कार्यक्रमले यो क्षेत्रको पर्यटनको अभिवृद्धि गर्ने मात्र होइन, शैक्षिक विकासमा समेत ठूलो भूमिका खेल्ने पोखरा विश्वविद्यालय विज्ञान तथा प्रविधि सङ्कायका डीन प्रा. राजेशकुमार ठगुराठीले बताउनुभयो । उहाँले सम्मेलनमा प्रस्तुत हुने कन्फरेन्स पेपरहरू व्यवहारिक विज्ञान, वातावरण, गणित लगायत सिभिल इन्जिनियरिङ, मेकानिकल इन्जिनियरिङ, कर्पोरेट इन्जिनियरिङ, मौसम परिवर्तन, फिजिक्स, सूचना प्रविधि लगायतका इन्जिनियरिङ्का विधाहरूमा रहेकोले यसले देश विकासमा ठूलो भूमिका खेल्ने बताउनुभयो । सम्मेलनमा स्नातकतह र स्नातकोत्तरतहमा अध्ययन गर्ने विद्यार्थीहरु, जो नयाँ अनुसन्धानकर्ताहरु छन्, उनिहरुले आफूले गरेको अनुसन्धानलाई पोष्टरको माध्यमबाट प्रस्तुतिकरण गरेका छन् । पोष्टर प्रस्तुतिकरणमा पोखरा विश्वविद्यालयका विभिन्न कलेजमा अध्ययनरत विद्यार्थीहरू, त्रिभुवन विश्वविद्यालय, सुदूर पश्चिम विश्वविद्यालय लगायतमा अध्ययनरत विद्यार्थीहरुको १५ वटा पोष्टरहरू प्रस्तुतिकरण भयो । आफूले गरेको अनुसन्धानको प्रचार प्रसार, यो यो अनुसन्धानले समाजको विकासमा भूमिका खेल्छ, अरू विद्वानहरुले पनि अनुसन्धान गरेका छन् भने त्यसको विषयमा छलफल गर्ने र भविष्यमा कुन कुन क्षेत्रमा अनुसन्धान गर्न सकिन्छ भन्ने विषयलाई पहिचान गर्ने डीन प्रा. ठगुराठीले बताउनुभयो । उद्घाटनसत्रको कार्यक्रमलाई सह–प्रा.डा. राजिव पोखरेलले सञ्चालन गर्नुभएको थियो ।

पोखरा विश्वविद्यालय शिक्षण अस्पतालको समुद्घाटन सम्पन्न

२०८१ जेठ ७ गते सोमबार, पोखरा–३०, कास्की ।
पोखरा विश्वविद्यालय शिक्षण अस्पतालको समुद्घाटन सम्पन्न भएको छ । गण्डकी प्रदेश सरकारका माननीय मुख्यमन्त्री श्री खगराज अधिकारीले पोखरा–३०, कास्की स्थित पोखरा विश्वविद्यालय परिसरमा निर्माण भएको १०० शैयाको पोखरा विश्वविद्यालय शिक्षण अस्पतालको आज शिलालेख अनावरण एवम् रिवन काटी बिधिवत रूपमा समुद्घाटन गर्नुभएको हो ।

समुद्घाटन समारोहलाई सम्बोधन गर्नुहुँदै मुख्यमन्त्री अधिकारीले पोखरा विश्वविद्यालय कोही कसैको एकल प्रयासबाट नभई सबैको सामूहिक पहल र योगदानबाट स्थापना भएको उल्लेख गर्दै शिक्षण अस्पतालले सबैको सहज पहुँच र अपनत्व हुने गरी स्तरीय सेवा दिनुपर्नेमा जोड दिनुभयो । मुख्यमन्त्री अधिकारीले विश्वविद्यालयले जनस्वास्थ्यलाई पहिलो प्राथमिकतामा राखेर आफ्नो सेवा विस्तार गर्नुपर्ने बताउनुभयो । उहाँले स्वास्थ्य बीमा र यस क्षेत्रका अन्य स्वास्थ्य संस्थाहरूसँग समन्वय गरी विश्वविद्यालयले अस्पतालको क्षमता अभिवृद्धि गर्दै जानुपर्ने बताउनुभयो । गुणस्तरीय शिक्षा र स्वास्थ्य सेवा प्रदान गर्ने कार्यमा विश्वविद्यालयलाई प्रदेश सरकारको महत्वपूर्ण सहयोग रहने उहाँको भनाई थियो ।

कार्यक्रममा आफ्नो मन्तव्य राख्दै गण्डकी प्रदेशकी सामाजिक विकास तथा स्वास्थ्य मन्त्री सीता कुमारी सुन्दासले विश्वविद्यालयले अनुसन्धान र खोजलाई प्राथमिकतामा राखेर ११ वटा छिमेकी जिल्लामा स्वास्थ्य सेवा विस्तार गर्नुपर्नेमा जोड दिनुभयो ।

कार्यक्रमलाई सम्बोधन गर्दै पोखरा विश्वविद्यालयका उपकुलपति प्रा.डा. प्रेमनारायण अर्यालले पोखरा विश्वविद्यालयमा शिक्षण अस्पताल सञ्चालन गर्न पाउँदा आफूले निकै गौरवान्वित महसूस गरेको उल्लेख गर्नुभयो । उहाँले शिक्षण अस्पतालको सञ्चालनले स्वास्थ्य विज्ञान सङ्काय अन्तर्गत विद्यार्थीले अन्य अस्पतालमा गएर प्रयोगात्मक अभ्यास गर्नुपर्ने अवस्थाको अन्त्य भएको र यस क्षेत्रका नागरिकको स्वास्थ्य सेवामा सुलभ र सहजता प्राप्त हुने विचार व्यक्त गर्नुभयो । उहाँले विश्वविद्यालयको शिक्षा र स्वास्थ्य सेवालाई अनुकरणीय तुल्याउन सरकारले विशेष लगानीका साथ ध्यान दिनुपर्नेमा जोड दिनुभयो ।

पोखरा महानगरपालिकाका नगरप्रमुख धनराज आचार्यले पोखरा विश्वविद्यालय क्रमिक रूपमा सेवाहरू विस्तार गरी लक्ष्य अनुरूप प्रगति पथमा अगाडि बढेको उल्लेख गर्नुभयो । उहाँले विश्वविद्यालयले अनुसन्धानात्मक क्रियाकलापलाई अझ बढि केन्द्रीत गरी स्वास्थ्य सेवालाई प्रभावकारी तुल्याउनुपर्नेमा जोड दिनुभयो ।

पोखरा विश्वविद्यालयका रजिष्ट्रार एवम् शिक्षण अस्पताल व्यवस्थापन समितिका अध्यक्ष प्रा.डा. दिपक बहादुर भण्डारीले पोखरा विश्वविद्यालय यस क्षेत्रकै गहना रहेको उल्लेख गर्दै शिक्षण अस्पताललाई देशको एक उत्कृष्ट सेवा दिने स्मार्ट अस्पतालको रूपमा विकास गर्ने सोच रहेको बताउनुभयो ।

पोखरा विश्वविद्यालय स्वास्थ्य विज्ञान सङ्काय डीन सह–प्रा.डा. अमर नागिलाले शिक्षण अस्पताल विश्वविद्यालयको महत्वाकांछी योजना रहेको उल्लेख गर्नुभयो । उहाँले विश्वविद्यालयमा २० वर्षदेखि सञ्चालित चिकित्सा शिक्षासँग सम्बन्धित शैक्षिक कार्यक्रमहरूको सञ्चालनलाई अस्पताल नभई नहुने भएकोले अस्पताल सञ्चालनमा ल्याइएको बताउनुभयो । विश्वविद्यालयमा सञ्चालित नर्सिङ, प्रयोगशाला विज्ञान, जनस्वास्थ्य, फार्मेशी आदिका स्नातक एवम् स्नातकोत्तर तहका कार्यक्रमहरू अनवरत सञ्चालन र गुणस्तरीय शिक्षा दिनलाई मात्र नभई समाजसँग जोड्न र सेवा भाव प्रदान गर्न समेत अस्पताल अपरिहार्य रहेको उहाँको भनाई थियो ।

पोखरा विश्वविद्यालय शिक्षण अस्पतालका कार्यकारी निर्देशक सह–प्रा.डा. दिपेन्द्रकुमार यादवले अस्पताल सञ्चालनमा विश्वविद्यालयका पदाधिकारी, शिक्षक, कर्मचारी लगायत प्रदेश सरकारका माननीय मन्त्री सचिवहरूको महत्वपूर्ण भूमिका र योगदान रहेको उल्लेख गर्नुभयो । उहाँले अस्पताललाई आवश्यक उपकरण, साधन तथा जनशक्तिको व्यवस्थापन गरिएको र आउँदा दिनमा सबैलाई समेट्ने र स्थानीयलाई सर्वसुलभ हुने गरी स्वास्थ्य सेवालाई प्रभावकारी तुल्याउने कार्यक्रम सञ्चालन गरिने बताउनुभयो ।

समाजसेवी स्थानीय विष्णु पोखरेलले पोखरा विश्वविद्यालयको स्थापनामा भएका पहलकदमी, योगदान र सहयोगलाई विश्वविद्यालयले अभिलेखिकरण गर्दै यसको गरिमा उच्च राख्नुपर्नेमा जोड दिनुभयो । उहाँले विश्वविद्यालयमा अस्पताल सञ्चालनले स्थानीयको शिक्षा र स्वास्थ्यमा महत्वपूर्ण सहयोग एवम् सेवा मिल्ने विश्वास व्यक्त गर्नुभयो ।

पोखरा विश्वविद्यालय प्राध्यापक संघका सभापनि सह–प्रा.डा. निरञ्जन श्रेष्ठले विश्वविद्यालयले अस्पतालको स्तरोन्नति गर्दै जानुपर्ने तथा विश्वविद्यालयमा कार्यरत शिक्षक तथा कर्मचारीहरूको स्वास्थ्य जाँचमा विशेष सहुलियता प्रदान गर्नुपर्नेमा जोड दिनुभयो ।

पोखरा विश्वविद्यालय कर्मचारी संघका अध्यक्ष चोलाकान्त च्वाँईले शिक्षण अस्पतालको सञ्चालनले विश्वविद्यालयको थप उचाई बढेको उल्लेख गर्दै अस्पतालबाट स्थानीयलाई सर्वसुलभ स्वास्थ्य सेवा उपलब्ध हुने बताउनुभयो ।

कार्यक्रममा विश्वविद्यालयका पदाधिकारी, शिक्षक, कर्मचारी लगायत विभिन्न कार्यालय र संघ संस्थाका कार्यालय प्रमुख, स्थानीय समाजसेवी, आमासमूह, स्वास्थ्य संस्थाका प्रमुख, वडा प्रमुख आदि गरी छसय भन्दा बढीको उपस्थिति रहेको थियो । कार्यक्रमको सञ्चालन सह–प्रशासक तारादेवी सापकोटाले गर्नुभएको थियो ।