ओपनद्वारा उपकुलपतिलाई स्वागत

२०७७ कार्तिक २५ गते, मंगलबार, लेखनाथ, कास्की ।

पोखरा विश्वविद्यालय शिक्षण संस्थाहरूको संघ नेपाल (OPEN) ले पोखरा विश्वविद्यालयका नवनियुक्त उपकुलपति प्रा.डा. प्रेमनारायण अर्याललाई एक कार्यक्रमको आयोजना गरी स्वागत गरेको छ । उक्त स्वागत कार्यक्रमलाई सम्बोधन गर्दै उपकुलपति अर्यालले विद्यार्थीहरूको सर्वोपरि हितलाई केन्द्रमा राखेर विश्वविद्यालयलाई माथि उठाउन सबैले होस्टेमा हैसे गर्नुपर्नेमा जोड दिनुभयो । उपकुलपतिले विद्यार्थीको वेदना बुझेर उनीहरूको इज्जत र प्रतिष्ठा बचाउन सके मात्रै विश्वविद्यालयको साख र गरिमा पनि दिगो रहने उल्लेख गर्नुभयो ।

उहाँले विश्वविद्यालयलाई सन्तुलन र सहकार्यमा अगाडि बढाउनुपर्ने भएकोले सम्बन्धित पक्षसँग सम्वाद, वहस र छलफल गरी पूर्णकालीन पदाधिकारी नियुक्ति चाँडै टुङ्गाइने बताउनुभयो । रातदिन नभनी विश्वविद्यालयका लागि खटिनुपर्ने अवस्था रहेको उल्लेख गर्दै उपकुलपतिले नीति नियम भित्र रहेर काम गरिने, त्यो नबनेको भए बनाउने र विश्वविद्यालय आफै धानिन सक्ने गरी केही आंगिक कलेजको विस्तार, केही नयाँ कार्यक्रम सञ्चालन तथा मेडिकल कार्यक्रमका लागि हस्पिटल सञ्चालन गर्ने सोच आफूमा रहेको बताउनुभयो । उपकुलपति अर्यालले ओपनले विश्वविद्यालयको विकासमा महत्वपूर्ण योगदान गरेको चर्चा गर्दै उनीहरूले विश्वविद्यालयलाई दिएको इज्जतमा आँच आउन नदिने उल्लेख गर्नुभयो ।

स्वागत कार्यक्रममा ओपनले अनलाइन क्लासलाई आधिकारिकता प्रदान गर्नुपर्ने, फल र स्प्रिङ सेमेष्टरको परीक्षा तालिका परीक्षाको मोडालिटीसहित आउनुपर्ने, परीक्षाको दिगो विकासका लागि समयमा नै कोर्ष सकिने गरी ४ वर्षको शैक्षिक क्यालेण्डर प्रकाशित गर्नुपर्नेमा जोड दिएको छ । उसले विश्वविद्यालयको स्पिरिट, स्पीड र सिस्टमलाई सुनिश्चित गर्न सकेमा विद्यार्थीलाई न्याय दिन सकिने विश्वास समेत व्यक्त गरेको छ । साथै शैक्षिक कार्यक्रममा नयाँपन ल्याउनुपर्नेमा जोड दिँदै उसले विद्यार्थी भर्नामा न्यूनतम जिपिए तोकेर अगाडि बढ्न सकेमा भर्ना अन्यौलता हट्न जाने र यसले विश्वविद्यालय, कलेज र विद्यार्थीलाई समेत ठूलो राहत पुग्ने विश्वास व्यक्त गरेको छ । ओपनले विश्वविद्यालयलाई कसरी सहि ढंगले अगाडि बढाउन सकिन्छ भन्ने कुरा कलेजहरू एक ठाउँमा बसेर एकले अर्कोलाई सहयोग गर्ने भावबाट अगाडि बढ्न सके विश्वविद्यालयको सार्वजनिक निजी साझेदारी (पिपिपि) मोडेलको लक्ष्यलाई टेवा पुग्ने समेत बताएको छ ।

कार्यक्रममा विश्वविद्यालयको तर्फबाट रजिष्टारको जिम्मेवारी सम्हाल्नुभएका प्रा.डा. विष्णुराज तिवारी, व्यवस्थापन संकायका डीन प्रा.हरिबहादुर खड्का, परीक्षा नियन्त्रकको जिम्मेवारी सम्हाल्नुभएका प्रा.डा. टेकराज ज्ञवाली, पोवि प्राध्यापक संघका सभापति हेमराज पाण्डे, कर्मचारी संघका सभापति शिवराज पण्डित तथा ओपनका तर्फबाट एपेक्स कलेजका प्राचार्य एल.पि. भानु शर्मा, ओपेनका अध्यक्ष एवम् नोबेल कलेजका संस्थापक नवराज पाण्डे, अक्सफोर्ड कलेज, गैडाकोट, नवलपरासीका प्राचार्य एवम् ओपेनका उपाध्यक्ष ई. हरि प्रसाद भण्डारी, युनिग्लोब कलेज, काठमाण्डौका प्राचार्य एवम् ओपेनका उपाध्यक्ष डा. नरबहादुर बिष्ट, क्रिमसन कलेज अफ टेक्नोलोजी, बुटवलका प्राचार्य देवीप्रसाद भण्डारीले आ–आफ्नो मन्तव्य राख्नुभएको थियो ।

उद्योगपति सूर्यबहादुर के.सी.प्रति हार्दिक श्रद्धाञ्जली !!!

२०७७ कार्तिक १८ गते मङ्लबार, लेखनाथ, कास्की ।
प्रतिष्ठित उद्योगपति एवम् समाजसेवी सूर्यबहादुर के.सी.को २०७७ कार्तिक १७ गते सोमबार राति १०ः३० बजे पोखरा–७, एयरपोर्टस्थित आफ्नै निवासमा ६३ वर्षको उमेरमा हुन गएको निधनप्रति गहिरो शोकसहित हार्दिक श्रद्धाञ्जली अर्पण गर्दछौं । उहाँ पोखरा विश्वविद्यालयको पूर्व सभासद् एवम् भौतिक पूर्वाधार निर्माण समितिको सदस्य हुनुहुन्थ्यो । यस दुःखद घडिमा उहाँले पोखरा विश्वविद्यालयको स्थापना, विकास र प्रबर्धनमा विभिन्न तवरले पुर्याउनु भएको योगदानको उच्च कदरसहित सम्मान गर्दै हार्दिक स्मरण समेत गर्दछौं । उहाँ केही वर्षदेखि उच्च रक्तचाप र मधुमेह रोगबाट पिडित हुनुहुन्थ्यो । उहाँको एक श्रीमति र तीन छोराहरू हुनुहुन्छ । शोकको यस घडिमा उहाँको आत्माको चिरशान्तिको कामनासहित शोक सन्तप्त परिवारजनमा समवेदना प्रकट गर्दै धैर्य धारण गर्ने शक्ति प्राप्त होस् भन्ने कामना समेत गर्दछौं ।

पोखरा विश्वविद्यालय
लेखनाथ, कास्की ।

उपकुलपति प्रा.डा. प्रेमनारायण अर्यालद्वारा पदभार ग्रहण

२०७७ असोज १८ गते आइतबार, पोखरा–३०, लेखनाथ, कास्की ।

पोखरा विश्वविद्यालयका नवनियुक्त उपकुलपति प्रा.डा. प्रेमनारायण अर्यालले आज एक समारोहबीच उपकुलपति पदको पदभार ग्रहण गर्नुभयो । पदस्थापनपछि विश्वविद्यालयद्वारा आयोजित स्वागत कार्यक्रममा बोल्दै उपकुलपति अर्यालले नीति र नियमभन्दा बाहिर गएर आफूले कुनै कार्य एवम् कदम नचाल्ने प्रतिबद्धता व्यक्त गर्नुभयो । सम्माननीय प्रधानमन्त्रीज्यूसँग विश्वविद्यालयको समस्या र अन्यौलता समाधानका बारेमा आफूले कुरा राख्दा उहाँले नीति नियममा रही निर्धक्क भएर अगाडि बढ्न सुझाउनु भएको समेत उहाँले उल्लेख गर्नुभयो ।

जहाँ चुनौती छ त्यहाँ सम्भावना छ । जहाँ चुनौति छैन, त्यो जागिर खाने हुन्छ, तर म जागिर खान आएको होइन भन्दै उपकुलपति अर्यालले आफूलाई अब कसरी यो विश्वविद्यालय बनाउने, कसरी यसलाई व्यवस्थापन गर्ने भन्ने मुख्य चिन्ता रहेको उल्लेख गर्नुभयो । उपकुलपति अर्यालले भन्नुभयो– कुनै पनि पदाधिकारी आएर मेरो हातमा तिलस्मीको छडि छ, सब ठिक पार्छु भन्यो भने त्यो नबुझेको हुन्छ, तर म बुझ्छु मात्र र बुझेको पनि छु ।

उहाँले विश्वविद्यालय विद्यार्थीहरूको योग्यता मापन गर्ने थलो भएकोले एकवर्षदेखि ती कार्य बन्द हुनु विद्यार्थीका लागि ज्यादै पिडादायी क्षण रहेको उल्लेख गर्नुभयो । सोको लागि विश्वविद्यालयलाई अनिर्णयको बन्दी बनाउन नहुने उल्लेख गर्दै उहाँले विश्वविद्यालयको हक, हित तथा विद्यार्थीहरूको भविष्य सुनिश्चताका लागि सबै व्यक्तिगत स्वार्थभन्दा माथि उठि कार्य गर्नुपर्नेमा जोड दिनुभयो । यसका लागि आफू चौबिसै घण्टा पोखरा विश्वविद्यालयको लागि समर्पित रहने उहाँले बताउनुभयो ।

कोभिडले धेरै विश्वविद्यालयहरूलाई समस्यामा पारेको र केही विश्वविद्यालयले सामाजिक दुरी कायम गरी परीक्षा लिएको सन्दर्भमा २१ औं शताब्दीको प्रविधि मैत्री वातावरण सिर्जना गरी हामीले पनि अनलाईन पठनपाठन र परीक्षामा सञ्चालनका लागि ढिलो गर्न नहुनेमा उहाँको जोड थियो ।

पोखरा विश्वविद्यालय छोटो समयमा राम्रो प्रतिष्ठा कायम गरेको र धेरै कार्यक्रम ल्याएर एउटा ख्याति कमाएको विश्वविद्यालय भएकोले यसको अझ बढी प्रबर्धन र उत्थानका लागि केही राहत कार्यक्रमहरू सञ्चालनमा ल्याउनु पर्नेमा समेत उपकुलपतिले जोड दिनभयो । यसका लागि मेडिकल कलेजको स्थापना, बिद्युत, कानुन र शिक्षामा पठनपाठनदेखि लिएर देशको यस सुन्दर क्षेत्रलाई पर्यटकीय अध्ययन केन्द्रको रूपमा विकास गर्न सकिने उहाँको भनाई थियो । यसका लागि सबैको सहयोग र योगदान चाहिन्छ, केही समस्या भए सम्वाद, सहमति र सहकार्यमा अगाडि बढ्न सकिन्छ, उपकुलपतिले भन्नुभयो ।

स्वागत कार्यक्रममा पोखरा विश्वविद्यालय सेवा आयोगका अध्यक्ष रघुनाथ अधिकारी, पोखरा विश्वविद्यालय व्यवस्थापन संकायका डीन प्रा. हरिबहादुर खड्का, स्कूल अफ डेभलेपमेन्ट सोसल ईञ्जियिरिङ्गका स्कूल निर्देशक डा. रामप्रसाद अर्याल, पोखरा विश्वविद्यालय कार्यकारी परिषद्का सदस्य सहप्राध्यापक हरिप्रसाद त्रिपाठी, पोखरा विश्वविद्यालय प्राध्यापक संघका अध्यक्ष हेमराज पाण्डे तथा पोखरा विश्वविद्यालय कर्मचारी संघका अध्यक्ष शिवराज पण्डितले विश्वविद्यालयका समस्याका बारेमा आ–आफ्नो मन्तव्य राख्नु भएको थियो । कार्यक्रमको सञ्चालन सहप्रशासक तारा सापकोटाले गर्नुभएको थियो ।

पोखरा विश्वविद्यालयको उप–कुलपतिमा प्रा. डा. प्रेमनारायण अर्याल नियुक्त

सम्माननीय प्रधानमन्त्री तथा पोखरा विश्वविद्यालयका कुलपति के.पि. शर्मा ओलिले पोखरा विश्वविद्यालय ऐन २०५३ बमोजिम पोखरा विश्वविद्यालयको रिक्त रहेको उप–कुलपति पदमा प्रा.डा. प्रेमनारायण अर्याललाई २०७७ असोज १४ गते बुधबार नियुक्त गर्नुभएको छ । नवनियुक्त उप-कुलपति अर्यालले आउँदो आइतबार (असोज १८) गते पोखरा विश्वविद्यालयको केन्द्रीय कार्यालय, लेखनाथमा पदबहाली गर्नुहुने कार्यक्रम छ । ४ (चार) वर्षको लागि उप–कुलपति पदमा नियुक्त प्रा. डा. अर्याललाई हार्दिक बधाई ज्ञापन गर्दै उहाँको सफल कार्यकालको हार्दिक शुभ–कामना व्यक्त गर्दछौं ।

पोखरा विश्वविद्यालय
पोखरा–३०, लेखनाथ, कास्की ।

राष्ट्रकवि माधवप्रसाद घिमिरेप्रति हार्दिक श्रद्धाञ्जली !!

२०७७ भदौ २ गते, मङ्गलबार ।
राष्ट्रकवि माधवप्रसाद घिमिरेको २०७७ भदौ २ गते मङ्गलबार अपरान्ह ५ः३० बजे आफ्नै निवास लैनचोर, काठमाडौंमा हुन गएको निधनप्रति गहिरो शोकसहित हार्दिक श्रद्धाञ्जली अर्पण गर्दछौं । उहाँ १०१ वर्षको हुनुहुन्थ्यो । उहाँको जन्म वि.सं. १९७६ असोज ७ गते लमजुङ जिल्लाको पुस्तुनमा भएको थियो । उहाँ केहि समयदेखि श्वासप्रश्वास, रक्तचाप र मधुमेहको समस्याबाट पिडित हुनुहुन्थ्यो । नेपाली वाङ्मय क्षेत्रमा दशकौं लामो साहित्य साधना र योगदान गर्नुहुने राष्ट्रकवि घिमिरे स्वच्छन्दतावादी भावधारा र परिष्कारवादी शैली भएका एक कुशल र सिद्धहस्त वरिष्ठ नेपाली साहित्यकार, कवि र गीतकार हुनुहुन्थ्यो ।

उहाँले वि.सं. २०७३ वैशाख ८ गते सम्पन्न पोखरा विश्वविद्यालयको १३ औं दीक्षान्त समारोहमा प्रमुख अतिथिको रूपमा सहभागिता जनाउनु भएको थियो । उहाँको जेठी श्रीमती गौरीको विसं २००४ मा निधनपछि उहाँले रचेको गौरी शोककाव्य र अन्य दर्जनौँ काव्य, गीतिनाटक, कथा, यात्रा संस्मरण र अनुवाद विधामा उहाँका कृतिहरू लोकप्रिय छन् । उहाँका नवमञ्जरी, घामपानी, नयाँ नेपाल र किन्नरकिन्नरी आदि कविता संग्रह प्रकाशित छन् भने “गाउँछ गीत नेपाली”, “फूलको थुङ्गा बगेर गयो” तथा “आजै र राति के देखे सपना” आदि गीतहरू प्रख्यात छन् ।

उहाँका श्रीमती, दुई छोरा र ६ छोरी हुनुहुन्छ । शोकको यस घडिमा उहाँको चिरशान्तिको कामना गर्दै शोक सन्तप्त परिवारजनप्रति धैर्य धारण गर्ने शक्ति प्राप्त होस् भन्ने कामना समेत व्यक्त गर्दछौं ।

प्रा.डा. राधेश्याम कायस्थप्रति हार्दिक श्रदासुमन

२०७७ साउन १५ गते, विहीबार, पोखरा, कास्की ।
वरिष्ठ वनस्पतिशास्त्री एवम् शिक्षाविद् प्रा.डा. राधेश्याम कायस्थकोे ७८ वर्षको उमेरमा चरक मेमोरियल अस्पताल, नयाँबजार, पोखरामा २०७७ साउन १५ गते हुन गएको निधनप्रति गहिरो शोकसहित हार्दिक श्रदासुमन अर्पण गर्दछौं । उहाँ पोखरा विश्वविद्यालयको पूर्व सभासद्, प्राज्ञिक परिषद्को सदस्य, साइन्स विषय समितिको अध्यक्ष एवम् वि.फार्मेसी विषय समितिको सदस्य हुनुहुन्थ्यो । यस दुःखद घडिमा उहाँले पोखरा विश्वविद्यालयको विकास र प्रबर्धनमा विभिन्न पदमा बसी पुर्याउनु भएको योगदानको उच्च कदरसहित सम्मान गर्दै हार्दिक स्मरण समेत गर्दछौ । पोखराको शिक्षा क्षेत्रको एक पर्यायको रूपमा स्थापित अग्रणी शिक्षासेवी प्रा.डा. कायस्थ केही समयदेखि दम रोगबाट पिडित हुनुहुन्थ्यो । उहाँका एक श्रीमति, दुई छोरा र एक छोरी हुनुहुन्छ । शोकको यस घडिमा उहाँको चिरशान्तिको कामना गर्दै शोक सन्तप्त परिवारजनप्रति धैर्य धारण गर्ने शक्ति प्राप्त होस् भन्ने कामना समेत व्यक्त गर्दछौं ।

पोखरा विश्वविद्यालय
लेखनाथ, कास्की ।