जानकारी सम्बन्धमा ।

मिति २०७७ चैत्र १० गते अखिल नेपाल राष्ट्रिय स्वतन्त्र विद्यार्थी युनियनले विज्ञप्तिमार्फत विभिन्न मागहरू पेश गरेको सन्दर्भमा उक्त मागहरू उपर निम्नानुसारको काम-कार्यवाही भएको व्यहोरा जानकारी गराईन्छ:
१) २०७७ चैत्र ९ गते प्रकाशित गरिएको परीक्षा तालिका सम्बन्धमा आवश्यक संसोधन भइ नयाँ तालिका पुनः प्रकाशन गरिसकिएको ।
२) यस अघि सम्पन्न भएका स्नातकतहका कार्यक्रमका परीक्षाफलहरूका सम्बन्धमा नतिजा प्रकाशन कार्य मिति २०७७ चैत्र २३ गते देखि शुरू भैसकेको ।
३) पोखरा विश्वविद्यालयले लिने स्नातकतहका छात्रवृत्तीका सम्बन्धमा तत्कालीन अवस्थामा Online आबेदन प्रकृयामा आई परेका समस्याहरू समाधान भई परीक्षा समेत सम्पन्न भईसकेको । नतिजा प्रकाशनको कार्य आवश्यक सजकताका साथ अगाडि बढाइएको ।
४) चौथो बर्ष बाहेकका स्नातकतहका बाँकी रहेका सेमेष्टर वार्षिक कार्यक्रमका परीक्षाका सम्बन्धमा उक्त परीक्षा जेष्ठ महिनाको तेश्रो हप्ताबाट सञ्चालन गर्ने गरी कार्य अगाडि बढाईएको ।
५) पोखरा विश्वविद्यालयमा रजिष्ट्रार नियुक्ति सम्बन्धमा पोखरा विश्वविद्यालय ऐन बमोजिम रजिष्ट्रार नियुक्तिको प्रकृया अगाडि बढाईएको ।

आज्ञाले,

लोकप्रसाद ढकाल
सूचना अधिकृत
२०७७ चैत्र २४ गते मङ्गलबार

जानकारी सम्बन्धमा ।

मिति २०७७ चैत्र १० गते नेपाल विद्यार्थी संघ (पोखरा विश्वविद्यालयमूल इकाई समिति) ले विज्ञप्तिमार्फत विभिन्न मागहरू पेश गरेको सन्दर्भमा उक्त मागहरू उपर निम्नानुसारको काम–कार्यवाही भएको व्यहोरा जानकारी गराईन्छ ।
१) पोखरा विश्वविद्यालय रजिष्टार नियुक्ति सम्बन्धमा पोखरा विश्वविद्यालय ऐन बमोजिम रजिष्टार नियुक्तिको प्रकृया अगाडि बढाईएको ।
२) पोखरा विश्वविद्यालयले लिने स्नातकतहका छात्रवृत्तिका सम्बन्धमा आई परेका समस्याहरू समाधान भई परीक्षा समेत सम्पन्न भईसकेको ।
३) पोखरा विश्वविद्यालय आंगिक स्कूलहरूमा अध्ययनरत विद्यार्थीहरूको Field Visit सम्बन्धमा सम्बन्धित स्कूलहरूले पाठ्यक्रममा व्यवस्था भएबमोजिम Field Visit गर्ने/गराउने ।
४) पोखरा विश्वविद्यालयको प्राज्ञिक भवन कम्प्लेक्सभित्र रहेको बास्केटबल कोर्टको मर्मत सम्बन्धमा उक्त कार्य जिम्मा लगाईएको निर्माण कम्पनीले यही हप्ताभित्र कार्य शुरू गर्ने ।
५) पोखरा विश्वविद्यालयमा स्थगित रहेको दीक्षान्त समारोह सम्बन्धमा विश्वविद्यालयमा रजिष्ट्रार नियुक्ति भएपछि अगाडि बढाईने ।
६) पोखरा विश्वविद्यालयको शैक्षिक क्यालेण्डर सम्बन्धमा कोभिड–१९ को विषम परिस्थितिले सृजित अवस्थालाई ध्यानमा राखेर विस्तृत शैक्षिक क्यालेण्डर तयार हुने क्रममा रहेको ।
७) पोखरा विश्वविद्यालयको स्कूल अफ हेल्थ एण्ड एलाईड साईन्सेजमा २०१९ स्प्रिङ्ग सेमेष्टरको जेहेन्दार छात्रवृत्तिका सम्बन्धमा आवश्यक निर्णयका लागि कार्यकारी परिषदमा पेश गर्ने प्रक्रृया अगाडि बढाईएको ।

आज्ञाले,

लोकप्रसाद ढकाल
सूचना अधिकृत
२०७७ चैत्र २३ गते सोमबार

पठनपाठन बन्द हुनेसम्बन्धी सूचना !!!

विगत केही दिनदेखि निरन्तर वायुमण्डलमा देखा परिरहेको अस्वभाविक वातावरणीय प्रदुषणका कारण विद्यार्थीहरूको स्वास्थ्यमा प्रतिकूल असर पर्नसक्ने भन्दै नेपाल सरकार शिक्षा, विज्ञान तथा प्रविधि मन्त्रालयद्वारा तत्कालका लागि सबै शिक्षण संस्थाहरू आगामी चैत्र २० गते शुक्रबारसम्म बन्द गर्ने निर्णय भएअनुरूप यस गम्भिर अवस्थालाई दृष्टिगत गरी पोखरा विश्वविद्यालय र यस अन्तर्गतका निकायहरूमा पनि नियमित प्रशासनिक कार्यहरू यथावत् सञ्चालन हुने गरी २०७७ चैत्र १७ गते मंगलबारदेखि २०७७ चैत्र २० गते शुक्रबारसम्म नियमित पठनपाठन बन्द गर्ने निर्णय गरिएकोले सम्बन्धित सबैको जानकारीका लागि यो सूचना प्रकाशित गरिएको छ । तथापि पोखरा विश्वविद्यालयद्वारा पूर्व निर्धारित कार्यतालिका अनुसारका सेमष्टर, ट्राइमेष्टर र वार्षिक परीक्षाहरू स्वास्थ्य सजगता अपनाउँदै यथावत् सञ्चालन हुने व्यहोरा निर्णयअनुसार सूचित गरिन्छ ।

आज्ञाले

लोकप्रसाद ढकाल
सूचना अधिकृत
२०७७ चैत्र १६ गते, सोमबार ।

पोखरा विश्वविद्यालयको अत्यन्त जरूरी सूचना !!!

विश्वव्यापी महामारीको रूपमा फैलिएको कोभिड–१९ (कोरोना भाइरस) को संक्रमण दर पछिल्लो समयमा पुनः बढ्न थालेकोले नेपाल सरकार, स्वास्थ्य तथा जनसंख्या मन्त्रालय र गृह मन्त्रालयको निर्देशन तथा जिल्ला प्रशासन कार्यालयबाट जारी सूचना अनुसार पोखरा विश्वविद्यालयमा कोभिड–१९ (कोरोना भाइरस) को संक्रमण रोकथाम तथा नियन्त्रण सन्दर्भमा देहायबमोजिम गर्न गराउन हुन सम्बन्धित सबैमा सूचित गरिन्छः

१. पोखरा विश्वविद्यालय र यस मातहतका आङ्गिक, संयुक्त आङ्गिक तथा सम्बन्धनप्राप्त महाविद्यालयहरूमा आवागमन गर्दा सम्बन्धित पदाधिकारी, शिक्षक, कर्मचारी लगायत विद्यार्थीहरूले अनिवार्य रूपमा मास्कको प्रयोग गर्ने र अन्य तोकिएका जनस्वास्थ्यका मापदण्डहरूको पूर्ण पालना गरी गराई सुरक्षित तवरले सेवा प्रवाह गर्ने, अध्ययन–अध्यापनको व्यवस्था मिलाउने । साथै विश्वविद्यालय र महाविद्यालयहरूको प्रवेश मार्गमा खटाइने सुरक्षाकर्मीलाई सबै किसिमका आवागमनमा यो व्यवस्थालाई कडाईका साथ अनिवार्य लागू गर्न लगाउने ।

२. विश्वविद्यालय र महाविद्यालयहरूले अत्यावश्यक गोष्ठी, सेमिनार, कार्यक्रम सञ्चालन गर्दा कोभिड नियन्त्रण तथा रोकथामका लागि अनिवार्य रूपमा तोकिएका जनस्वास्थ्यका मापदण्ड पालना गर्ने, गराउने । साथै अनावश्यक सभा, समारोह, सम्मेलन, भेला आयोजना नगर्ने, कहि कतै कुनै भिडभाड नगर्ने, नगराउने ।

आज्ञाले

लोकप्रसाद ढकाल
सूचना अधिकृत
२०७७ चैत्र १५ गते, आइतबार ।