नवनियुक्त रजिष्ट्रार भण्डारीबाट पदभार ग्रहण !!!

वि.सं. २०७८ बैशाख ६ गते सोमबार, पोखरा–३०, कास्की ।
पोखरा विश्वविद्यालयका नवनियुक्त रजिष्ट्रार सह–प्राध्यापक डा. दिपक बहादुर भण्डारीले उपकुलपति प्रा.डा. प्रेमनारायण अर्यालको समुपस्थितिमा आज एक समारोहबीच रजिष्ट्रारको पदभार ग्रहण गर्नुभयो । उहाँलाई आइतबार सम्माननीय प्रधानमन्त्री एवम् पोखरा विश्वविद्यलयका कुलपति केपि शर्मा ओलिले पोखरा विश्वविद्यालय ऐन २०५३ बमोजिम रजिष्ट्रार पदमा ४ वर्षका लागि नियुक्ति गर्नुभएको थियो ।

लेखनाथमा अवस्थित पोखरा विश्वविद्यालयको सभाकक्षमा नवनियुक्त रजिष्ट्रार भण्डारीलाई स्वागत गर्दै विश्वविद्यालयका उपकुलपति प्रा.डा. प्रेमनारायण अर्यालले धेरै समयको प्रतिक्षापछि विश्वविद्यालयले पूर्णकालीन रजिष्ट्रार प्राप्त गरेको उल्लेख गर्नुभयो । उपकुलपतिले विश्वविद्यालयभित्रैबाट रजिष्ट्रार नियुक्ति हुनु एउटा सकारात्मक पक्ष भएको उल्लेख गर्नुभयो । विश्वविद्यालयलाई कसरी अगाडि लैजाने भन्ने विषयमा शिक्षक तथा कर्मचारीले देखाएको निरन्तर चिन्तनको प्रशंसा गर्दै उपकुलपति अर्यालले सबैमा सकारात्मक सोच र आपसी सहयोग भएमा विश्वविद्यालयको भविष्य उज्ज्वल रहेको बताउनुभयो । उहाँले आउँदा दिनमा विश्वविद्यालयमा पदाधिकारी नियुक्तिमा सिनियर र सक्षम व्यक्तित्वलाई प्राथमिकता दिने र ताला कल्चरलाई अन्त्य गरिने बताउनुभयो ।

कार्यक्रममा बोल्दै विश्वविद्यालयका नवनियुक्त रजिष्ट्रार डा. दिपक बहादुर भण्डारीले विश्वविद्यालयलाई अउँदा दिनमा कसरी अगाडि लैजाने भन्ने विषयमा आफूले बिजनेश डेभलपमेन्ट प्लान बनाई अगाडि बढ्ने बताउनुभयो । म्यानेजमेन्ट कस्तो हुनुपर्छ, शिक्षा कस्तो हुनुपर्छ भन्ने कुरा देखेको छु, बुझेको छु भन्दै रजिष्ट्रार भण्डारीले त्यसै अनुरूप अगाडि बढ्ने प्रतिबद्धता समेत व्यक्त गर्नुभयो । साथै उहाँले पोखरा विश्वविद्यालयसित धेरै राम्रा शैक्षिक कार्यक्रम रहेको तर भौतिक पूर्वाधार प्रयाप्त नभएकोले अपेक्षित प्रगति हासिल गर्न नसकेको उल्लेख गर्नुभयो । त्यसैले भौतिक पूर्वाधार निर्माण आफ्नो पहिलो प्राथमिकता रहेको उहाँले बताउनुभयो ।

विश्वविद्यालयमा धेरै चुनौति रहेको स्वीकार गर्दै उहाँले असम्भव भन्ने केही नभएको तर सबैमा सकारात्मक सोचको खाँचो रहेको औल्याउनुभयो । विश्वविद्यालय बनाउने हो भने म भए सबै ठिक अरू भए सबै बेठिक भन्ने सोच परिवर्तन गर्नुपर्नेमा उहाँले जोड दिनुभयो । हामी जति छौं, सबैको क्षमता चिनेको छु, देखेको छु, तर काम गर्ने वातावरण छैन भन्दै उहाँले सबै शिक्षक, कर्मचारी मिलेर वातावरण बनाउनुपर्नेमा समेत जोड दिनुभयो । सहि व्यक्ति, सहि ठाउँ, पुरस्कार दण्डको व्यवस्थालाई आफूले कडाईका साथ लागू गरेर देखाउँने उद्घोष गर्दै उहाँले यसमा सबैबाट साथ सहयोगको अपेक्षा गर्नुभयो ।

स्वागत कार्यक्रममा पोखरा विश्वविद्यालय सेवा आयोगका अध्यक्ष सहप्राध्यापक रघुनाथ अधिकारी, निवर्तमान रजिष्ट्रारको जिम्मेवारी लिनुभएका स्कूल अफ हेल्थ एण्ड एलाईड साइन्सेजका प्रा.डा. विष्णुराज तिवारी, व्यवस्थापन संकायका डीन प्रा. हरिबहादुर खड्का, मानविकी तथा सामाजिकशास्त्र संकायेको डीनको जिम्मेवारीमा रहनुभएका सहप्राध्यापक डा. अजय थापा, स्कूल अफ डेभलपमेन्ट एण्ड सोसल ईञ्जिनियरिङ्गका स्कूल निर्देशक डा. रामप्रसाद अर्याल, पोखरा विश्वविद्यालय प्राध्यापक संघका सभापति उपप्राध्यापक हेमराज पाण्डे, कर्मचारी संघका सभापति उपप्रशासक शिवराज पण्डितले विश्वविद्यालयको वर्तमान अवस्था, चुनौति र अवसरका बारेमा आ–आफ्नो विचार व्यक्त गर्नुभएको थियो ।

नवनियुक्त रजिष्टार भण्डारीले त्रिभुवन विश्वविद्यालयबाट एमबिएसमा स्नातकोत्तर र बित्तीय अर्थशास्त्रमा यू.के.बाट विद्यावारिधि गर्नुभएको छ । विगत ११ वर्षदेखि उहाँ पोखरा विश्वविद्यालय स्कूल अफ बिजनेशमा सहप्राध्यापक पदमा कार्यरत रहँदै आउनु भएको छ भने उहाँले पोखरा विश्वविद्यालयको विषम परिस्थितिमा नौ महिना रजिष्ट्रार भएर कार्यानुभव समेत लिनुभएको छ । उहाँले व्यवस्थापन संकायमा डीन र सहायक डीनको पदमा रहेर पनि कार्य गरिसक्नुभएको छ । विश्वविद्यालयका पदाधिकारी, शिक्षक तथा कर्मचारी उपस्थिति रहेको उक्त कार्यक्रमको सञ्चालन सहप्रशासक तारादेवि सापकोटाले गर्नुभएको थियो ।

हार्दिक श्रदासुमन !!!

२०७७ चैत्र २४ गते मङ्गलबार, लेखनाथ, कास्की ।
पोखरा विश्वविद्यालय स्थापनाका एक सक्रिय अभियन्ता एवम् सामाजिक व्यक्तित्व चक्रपाणि पौलेलको २०७७ चैत्र २३ गते सोमबार तनहुँको देवघाटमा हुन गएको असामयिक निधनप्रति गहिरो दुःख व्यक्त गर्दै हार्दिक श्रदासुमन अर्पण गर्दछौ । उहाँ ७८ वर्षको हुनुहुन्थ्यो । उहाँले पोखरा विश्वविद्यालय स्थापनाका लागि जनस्तरबाट गठित समितिमा सदस्य, जग्गा व्यवस्थापन एवम् संरक्षण उपसमितिमा संयोजक, पोखरा विश्वविद्यालयको भौतिक पूर्वाधार निर्माण समितिमा सदस्य, पोखरा विश्वविद्यालय सभाको सभासद् आदि विभिन्न पदमा रही महत्वपूर्ण भूमिका निर्वाह गर्नुभएको थियो । यस दुःखद घडिमा उहाँले पोखरा विश्वविद्यालयको स्थापना र विकासमा विभिन्न पदमा बसी पुर्याउनुभएको योगदानको उच्च करदसहित सम्मान गर्दै हार्दिक स्मरण समेत गर्दछौं । शोकको यस क्षणमा शिक्षाप्रेमी पौडेलेको आत्माको चिरशान्तिको कामना गर्दै शोक सन्तप्त परिवारजनमा हार्दिक समवेदना प्रकट गर्दछौं ।

पोखरा विश्वविद्यालय
पोखरा–३०, लेखनाथ, कास्की ।

उद्यमशीलता विकासमा नयाँ शैक्षिक कार्यक्रम शुभारम्भ !!!

२०७७ फागुन २१ गते शुक्रबार, पोखरा, कास्की ।
पोखरा विश्वविद्यालयले ४ वर्षे स्तानतकतहमा उद्यमशीलता विकाससम्बन्धी नेपालमै पहिलोपटक नयाँ शैक्षिक कार्यक्रमको शुभारम्भ गरेको छ । बेचलर अफ इन्ट्रिप्रिन्यूरशीप डेभलपमेन्ट प्रोगाम (बेड) नाम दिइएको उक्त कार्यक्रमलाई नेपाल सरकार उद्योग, वाणिज्य तथा आपूर्ति मन्त्रालय र पोखरा विश्वविद्यालयले संयुक्त रूपमा सञ्चालन गर्ने भएका छन् । युवालाई उद्यमशील बनाई आत्मनिर्भर तुल्याउने एवम् युवालाई नेतृत्व विकास र सामाजिक रूपान्तरणको अभियन्ता बनाउने प्रमुख लक्ष्यका साथ उद्योग, वाणिज्य तथा आपूर्ति मन्त्रालय र पोखरा विश्वविद्यायले लेकसाइड, पोखरामा एक संयुक्त समारोहको आयोजना गरी सो कार्यक्रमको औपचारिक शुभारम्भ भएको जानकारी दिएका छन् ।

कार्यक्रमका अध्यक्ष एवम् पोखरा विश्वविद्यालयका उपकुलपति प्रा.डा. प्रेमनारायण अर्यालले युवा उद्यमी भए वेरोजगारी हट्ने र उनीहरू स्वदेशमै रही देशलाई समृद्ध बनाउन सक्ने भएकोले उद्यमशीलता विकास कार्यक्रमले युवाको व्यक्तित्व विकासमा सहयोग गर्ने बताउनुभयो । उपकुलपतिले कार्यक्रमको विस्तार र विकासमा उद्योग मन्त्रालयले पूर्ण रूपमा विश्वविद्यालयललाई सहयोग गर्ने विश्वास समेत व्यक्त गर्नुभयो । कार्यक्रमका प्रमुख अतिथि एवम् उद्यमशीलता विकास र प्रबर्धनमा भारतको पहिलो विश्वविद्यालय स्वर्निम विश्वविद्यालय, गुजरातका भाइस प्रेसिडेन्ट आदि रिसभ जैनले उद्यमशीलता विकाससम्बन्धी कार्यक्रमको उ्रत्थानका लागि विश्वविद्यालयलाई हरतरहले सहयोग गर्ने प्रतिबद्धता जनाउनु भयो ।

उद्योग वाणिज्य तथा आपूर्ति मन्त्रालयका सहसचिव (प्रवक्ता) डा. नारायण प्रसाद रेग्मी, अन्तर्राष्ट्रिय श्रम संगठन कन्ट्री अफिस नेपालका स्कील्स फर इम्प्रुभमेन्ट प्रोजेक्ट्सका नेशनल प्रोग्राम कोर्डिनेटर श्री प्रकाश शर्मा, नेपाल उद्योग वाणिज्य महासंघका डेपुटि डाइरेक्टर जनरल श्री गोकर्ण अवस्थिले उद्यमशीलता विकास कार्यक्रमको प्रबर्धनका लागि हातेमालो गर्दै अगाडि बढउने प्रतिबद्धता जाहेर गर्नुभयो । मानविकी तथा सामाजिकशास्त्र संकाय डीन सहप्राध्यापक डा. अजय थापाले कार्यक्रमको उपादेयता र महत्वका बारेमा विस्तृत जानकारी गराउनु भएको थियो । उक्त कार्यक्रमको औपचारिक शुभारम्भ समारोहमा सम्बद्ध व्यक्तित्व, उद्यमी, कलेज, विद्यालय, सञ्चार माध्यमहरूका प्रमुख एवम् प्रतिनिधि लगायत पोखरा विश्वविद्यालयका पदाधिकारी, शिक्षक तथा कर्मचारीहरूको उपस्थिति रहेको थियो ।