२०८२ वैशाख ७ गते आइतवार पोखरा–३०, कास्की ।
पोखरा विश्वविद्यालयका रजिष्टार पदबाट कार्यकाल सम्पन्न गर्नुभएका प्रा.डा. दिपकबहादुर भण्डारीलाई विश्वविद्यालयले एक औपचारिक कार्यक्रमको आयोजना गरी बिदाई गर्यो । विश्वविद्यालयको केन्द्रीय कार्यालयको सभाकक्षमा आयोजित बिदाई कार्यक्रममा विश्वविद्यालयका पदाधिकारी, प्राध्यापक, कर्मचारी तथा विभिन्न निकायका शिक्षक, कर्मचारीहरुको उपस्थिति रहेको थियो। प्रा.डा. भण्डारीले २०७८ वैशाख ५ गतेदेखि २०८२ वैशाख ४ गतेसम्म विश्वविद्यालयको रजिष्टार पदमा रही सेवा दिनुभएको थियो।
कार्यक्रममा बोल्दै उपकुलपति प्रा.डा. बेदराज के.सी. ले प्रा.डा. भण्डारीले चार वर्षे कार्यकाल सफलतापूर्वक सम्पन्न गर्नुभएको उल्लेख गर्दै उहाँको कार्यकालमा भौतिक पूर्वाधार विकास, एकाडेमिक क्यालेन्डरको नियमितता र पाठ्यक्रम अद्यावधिक गर्ने जस्ता महत्वपूर्ण कार्यहरू सम्पन्न भएको बताउनुभयो। उहाँले राम्रा कार्यले पोखरा विश्वविद्यालयको छवि समाजमा सकारात्मक रूपमा स्थापित भएको र विद्यार्थीहरूको आकर्षण बढेको उल्लेख गर्नुभयो। उहाँले रजिष्टारलाई सरल, सहज र इमान्दारीपूर्वक काम गर्ने व्यक्तिका रूपमा चित्रण गर्दै भविष्यमा पनि उहाँ जहाँ गएपनि सफलता प्राप्त होस् भन्ने शुभेच्छा व्यक्त गर्नुभयो।
सेवा आयोगका अध्यक्ष प्रा.डा. तीर्थराज अर्यालले पनि भण्डारीको विद्वता, ज्ञान, सिप र नेतृत्व क्षमताको प्रशंसा गर्दै राष्ट्रले उहाँको योगदानको मूल्याङ्कन गर्ने विश्वास व्यक्त गर्नुभयो। उहाँले विश्वविद्यालयमा योग्य व्यक्ति आउनुपर्नेमा जोड दिँदै पदको लागि खुट्टा तान्ने प्रवृत्तिबाट जोगिनुपर्ने धारणा राख्नुभयो।
कार्यक्रममा मन्तव्य राख्दै प्रा.डा. दिपकबहादुर भण्डारीले आफ्नो कार्यकालमा विश्वविद्यालयबाट धेरै कुरा सिक्न पाएको, धेरै व्यक्तिहरूसँग चिनजान र सहकार्यको अवसर पाएको बताउनुभयो। उहाँले रजिष्टार पद सम्हाल्दा र अहिलेको अवस्था निकै फरक भएको उल्लेख गर्दै भौतिक पूर्वाधारमा भएको प्रगति, एकाडेमिक क्यालेण्डर अनुसार परीक्षा सञ्चालन, कार्यक्रम सञ्चालनका लागि हल, कक्षा कोठा निर्माणलाई तिव्रता दिएको उल्लेख गर्नुभयो । उहाँले आफ्नो कार्यकालमा समस्यामा सामूहिक छलफल र समाधानको अभ्यास, तथा साझा सपना देख्ने संस्कारको विकास भएको उल्लेख गर्नुभयो।
उहाँका अनुसार, कार्यकाल सुरु गर्दा विश्वविद्यालयको खातामा सीमित रकम मात्र थियो, तर हाल त्यो रकम करिब ५० प्रतिशतले वृद्धि भएको छ। उहाँले मुँसेटुँडामा ८ अर्बको महत्वाकांक्षी परियोजनाको डिपिआर तयार गरिएको, २४ वर्षपछि १०० शैयाको अस्पताल निर्माण गरिएको, जसले अब मेडिकल कार्यक्रम सञ्चालनमा सहजता ल्याएको जानकारी दिनुभयो। त्यस्तै, शिक्षक तथा कर्मचारीहरूको तालिम, बढुवा, र आवश्यकताअनुसारका व्यवस्थाहरू कार्यान्वयन गरिएको जानकारी दिँदै, समयमै परीक्षा र नतिजा प्रकाशनका कारण विद्यार्थी संख्या ३८ प्रतिशतले वृद्धि भएको उल्लेख गर्नुभयो।
व्यवस्थापन संकायका डीन सह–प्रा.डा. दयाराज ढकालले उहाँको सकारात्मक सोच, सहकार्य र नेतृत्व क्षमता उल्लेख गर्नुभयो। परीक्षा नियन्त्रक सह–प्रा.डा. तुल्सीराम भण्डारीले विश्वविद्यालयको पठनपाठन, परीक्षा र द्रुत गतिमा विकासमा रजिष्टारको उल्लेखनीय भूमिका रहेको बताउनुभयो।
कार्यकारी परिषद्का सदस्य तथा उप–प्राध्यापक योगराज लामिछानेले डा. दिपकबहादुर भण्डारीसँग एक दशकभन्दा लामो समयदेखि सहकार्य गर्दै आएको उल्लेख गर्दै पहिलोपटक उहाँसँग सहायक डीन र शिक्षकका रूपमा काम गर्न पाएको र पछिल्लो चरणमा उहाँ कुलसचिव (रजिष्टार) को भूमिकामा रहँदा आफूले उहाँलाई अत्यन्त समन्वयकारी, उत्तरदायी र कार्यप्रति समर्पित व्यक्तित्वका रूपमा अनुभव गरेको बताउनुभयो । उहाँले समग्र मूल्याङ्कन गर्दा उहाँले गरेका कार्यहरू निकै सकारात्मक भएको उल्लेख गर्दै पूर्व उपकुलपति प्रा.डा. प्रेमनारायण अर्यालको एक ऊर्जाशील सारथीको रुपमा आफूले अनुभव गरेको बताउनुभयो । उहाँलाई यथेष्ट ऊर्जाशील, साहसी, समन्वयकारी र कार्यकुशल व्यक्तित्वको रुपमा आफूले चित्रण गरेको लामिछानेले उल्लेख गर्नुभयो ।
प्राध्यापक संघका अध्यक्ष सह–प्रा.डा. निरञ्जन श्रेष्ठले विश्वविद्यालयको नेतृत्वमा योग्यताको मापदण्ड तोक्नुपर्ने र एकपटक चार वर्ष पदमा बसेपछि दोहोरिन नहुने धारणा राख्नुभयो।
पोखरा विश्वविद्यालय योजना तथा कार्यक्रम महाशाखा प्रमुख प्रा.डा. दिपकराज पौडेलले प्रा.डा. भण्डारीसँगको कार्यसम्बन्ध स्मरण गर्दै उहाँको उदारता, लगनशीलता र सहयोगी प्रवृत्तिको प्रशंसा गर्नुभयो।
पाठ्यक्रम विकास केन्द्रका कार्यकारी निर्देशक सह–प्रा.डा. पूर्णबहादुर खाँडले उहाँको कार्यकालमा विश्वविद्यालयले भौतिक, शैक्षिक र गुणस्तरीय मापदण्डहरू हासिल गरेको बताउनुभयो। स्कूल अफ हेल्थ एण्ड एलाईड साइन्सेज, पोखरा विश्वविद्यालयका स्कूल निर्देशक बिमला भट्टले रजिष्टारको जड स्तरबाट समस्या बुझेर कार्यलाई निचोडमा पुर्याउने अनुभवले काम गर्न सजिलो भएको बताउनुभयो ।
स्कूल अफ इञ्जिनियरिङका उप–प्राध्यापक निरज खड्काले स्थायी र करार शिक्षकबीच भेद नगरी समान दृष्टिकोण अपनाएको र करार शिक्षकका समस्याको समाधान गर्न रजिष्टारले महत्वपूर्ण भूमिका निर्वाह गरेको बताउनुभयो । कर्मचारी संघका अध्यक्ष सहायक प्रशासक चोलाकान्त च्वाइले रजिष्टारले विश्वविद्यालयको समग्र हितलाई बुझेर नेतृत्व गरेको भन्दै प्रशंसा गर्नुभयो।
कार्यक्रममा स्वागत मन्तव्य सह–प्रशासक यादव थापाले राख्नुभएको थियो भने कार्यक्रमको सञ्चालन सह–प्रशासक तारादेवी सापकोटाले गर्नुभएको थियो।