मन्त्रालयद्वारा पोखरा विश्वविद्यालय शिक्षण अस्पतालको निरीक्षण
२०८० चैत्र १३ गते मङ्गलबार, पोखरा–३०, कास्की ।
सामाजिक विकास तथा स्वास्थ्य मन्त्रालय, गण्डकी प्रदेशका सचिव डा. विनोद विन्दु शर्माको नेतृत्वमा आएको निरीक्षण टोलीले मङ्गलबार पोखरा–३०, खुदीमा अवस्थित पोखरा विश्वविद्यालय शिक्षण अस्पताललाई सञ्चालन स्वीकृतिको मनशाय पत्र दिनेसम्बन्धमा स्थलगत निरीक्षण गरेको छ । सो अवसरमा अस्पताल व्यवस्थापन समितिका अध्यक्ष एवम् पोखरा विश्वविद्यालयका रजिष्ट्रार प्रा.डा. दिपक बहादुर भण्डारी, पोखरा विश्वविद्यालय शिक्षण अस्पतालका कार्यकारी निर्देशक डा. दिपेन्द्रकुमार यादव, पोखरा विश्वविद्यालय शिक्षण अस्पतालका स्त्री तथा प्रसुति रोग विशेषज्ञ डा. मदन खड्का लगायतले निरीक्षण टोलीलाई अस्पतालको हालसम्मको प्रगति विवरण र वर्तमान अवस्थाबारे विस्तृत जानकारी गराउनुभयो ।
टोलीले जनशक्ति, भवन तथा पूर्वाधारसम्बन्धी मापदण्ड लगायत बहिरङ्ग, अन्तरङ्ग, आकस्मिक र शल्यचिकित्सा एवम् सघन उपचार कक्षसम्बन्धी मापदण्ड, उपकरण, औषधि आदिका बारेमा अध्ययन तथा निरीक्षण गरी थप सुधार गर्नुपर्ने विषयमा अस्पताल व्यवस्थापन समितिलाई अवगत गराएको थियो ।
निरीक्षण टोलीमा सामाजिक विकास तथा स्वास्थ्य मन्त्रालय, गण्डकी प्रदेशका उप–सचिव चण्डिका पौडेल, मेडिकल सुपरिटेन्डेण्ट डा. धर्म ढकाल, महाशाखा प्रमुख डा. रमेश कुमार के.सी., आयुर्वेद चिकित्सक डा. मधुरजी ढकाल तथा फार्मेशी अधिकृत श्री साजन बराल हुनुहुन्थ्यो ।